Efektivët e FA vlerësohen në garën “Luftëtarët më të mirë” të Gardës Kombëtare të Nju Xhersit

e martë, 06 Maj 2025 15:26

Tetar Joni Mino dhe nëntetar Erkan Zagani pjesë e Forcave të Armatosura të Republikës së Shqipërisë janë vlerësuar për paraqitjen e tyre të shkëlqyer në garën “Luftëtarët më të mirë”, zhvilluar javën e kaluar nga Garda Kombëtare e Nju Xhersit në Shtetet e Bashkuara të Amerikës.

Tetari Joni Mino u shpall gjuajtësi më i mirë në poligonin e qitjes dhe fitoi vendin e parë në garën e lundrimit tokësor gjatë natës, ndërsa nëntetari Erkan Zagani triumfoi në garën në pistën e pengesave.

Gara sfiduese testoi qëndrueshmërinë, përgatitjen fizike dhe aftësitë taktike të pjesëmarrësve, duke theksuar edhe njëherë rëndësinë e bashkëpunimit të ngushtë mes Forcave të Armatosura shqiptare dhe Gardës Kombëtare të Nju Xhersit, në kuadër të Programit të Partneritetit Shtetëror.

Stërvitjet dhe aktivitetet e përbashkëta vijojnë të forcojnë ndërveprimin mes dy forcave dhe të rrisin gatishmërinë për përballimin e sfidave të përbashkëta.