Zëvendësministrja e Mbrojtjes, Blerina Abrazhda, vizitë zyrtare në kompaninë Leonardo për forcimin e bashkëpunimit teknologjik

140525

Zëvendësministrja e Mbrojtjes, znj. Blerina Abrazhda, kryesoi një delegacion zyrtar në Itali, ku zhvilloi një vizitë dyditore pranë kompanisë ndërkombëtare Leonardo, një nga liderët globalë në teknologjinë e mbrojtjes dhe sigurisë.

Në përbërje të delegacionit ishin edhe znj. Mirlinda Karçanaj, drejtoreshë e Përgjithshme e AKSHI, znj. Lorena Goxhobelli, drejtoreshë e Përgjithshme e Agjencisë Shtetërore të Kadastrës dhe znj. Vilma Tomço, drejtoreshë e Përgjithshme e ASIG.

Vizita kishte për qëllim forcimin e bashkëpunimit me Leonardon, një partner strategjik për modernizimin e kapaciteteve mbrojtëse të vendit, dixhitalizimin e infrastrukturës shtetërore dhe zhvillimin e zgjidhjeve të avancuara teknologjike në funksion të sigurisë kombëtare.

Gjatë takimeve me drejtuesit e kompanisë dhe vizitave në disa nga qendrat kryesore të saj, delegacioni shqiptar u njoh me kapacitetet teknologjike më të fundit në sigurinë kibernetike, hapësinore dhe mbrojtjen elektronike – fusha ku Shqipëria synon të investojë ndjeshëm në vitet e ardhshme.