Newsroom Vihet në punë radari në Midë, Xhaçka: Tashmë kemi një pamje të plotë të territorit të Shqipërisë
Forcat e Armatosura shqiptare do të kenë syrin e tyre, që i mungonte, për vëzhgimin e hapësirës ajrore.
Ministrja e Mbrojtjes Olta Xhaçka inspektoi radarin e sapondërtuar dhe të vënë në punë në Midë të Pukës. Radari është investim i qeverisë shqiptare dhe qeverisë amerikane dhe projekti u zbatua nga kompania amerikane “Lockheed Martin”.
Ministrja Xhaçka theksoi se ky është një nga investimet më të mëdha në Forcat e Armatosura, i cili do të ndiqet nga të tjerë, veçanërisht për Forcën Ajrore.
“Qeveria shqiptare përmes Ministrisë së Mbrojtjes, ka një vëmendje goxha të madhe ndaj përforcimit të kapaciteteve mbrojtëse të Forcave tona të Armatosura. Ky radar që shohim sot është pjesë e Sistemit të Integruar të Vëzhgimit të Hapësirës Ajrore. Është një nga investimet më të mëdha të Ministrisë së Mbrojtjes, posaçërisht 22 milion dollarë, 19 prej të cilave investim i qeverisë shqiptare dhe 3 milion dollarë investim i qeverisë së SHBA në këtë projekt, i cili i mundëson vendit tonë të veprojë në përputhje me kërcënimet me të cilat përballet Aleanca sot. Ky sistem është produkt i bashkëpunimit me gjigandin e industrisë botërore ushtarake, kompaninë prestigjoze amerikane në fushën e Mbrojtjes dhe Sigurisë, ‘Lockheed Martin’, kompani e cila është angazhuar edhe në mirëmbajtjen e Sistemit të Integruar të Vëzhgimit të Hapësirës sonë Detare, ndërkohë që përmes këtij radari, qendrat operacionale në Forcën Ajrore dhe në Forcat e Armatosura, si pjesë e Aleancës ushtarake më të fuqishme në botë, kanë prej ditës së sotme një pamje të plotë dhe të qartë ajrore të territorit të Shqipërisë, duke mundësuar kështu edhe reagimin në përputhje me kërcënimet shumëdimensionale që Aleanca ka në epokën që po jetojmë. Sistemi i Integruar i Vëzhgimit të Hapësirës Ajrore është vërtet investimi më i madh në këtë sektor, por Forca Ajrore prej vitesh është futur në një proces modernizimi, pjesë e të cilës do të bëhen edhe helikopterët ‘Black Hawk’, që pritet t’i shtohen pas pak muajsh Flotës sonë Ajrore apo projekteve të tjera që lidhen me sistemin ajror mbrojtës sipas standardeve të NATO.”- u shpreh Xhaçka.
Me këtë radar, helikopterët “Black Hawk” që do të vijnë së shpejti, investimin në Kuçovë, apo projektet që lidhen me sistemin ajror mbrojtjes, Forca jonë Ajrore arrin një nivel operacionaliteti, që i kishte munguar.
Projekti për radarin e sapoinstaluar në malin e Midës në Pukës kushtoi 22 milion $, 19 prej të cilave nga buxheti i shtetit dhe 3 milion donacion i qeverisë së SHBA.
VIDEO
