Çfarë është Modernizimi i FA (mjetet, teknika, infrastruktura)

Modernizimi i Forcave tё Armatosura është njё proces kompleks, i cili përfshin ndryshimet thelbësore të kapaciteteve materiale për tё pёrmbushur objektivat strategjikë.
Forcat e Armatosura synojnë rritjen e niveleve cilësore nëpërmjet shndërrimit të tyre në një forcë profesioniste, të mirëstërvitur, të pajisur me sisteme të teknikës dhe të armatimit bashkëkohor, me mjete moderne e të ndërveprueshme, dhe të aftë për të realizuar operacione të një spektri të gjerë. Këtij qëllimi i shërben procesi i modernizimit në FA.

Modernizimi i FA fokusohet në disa fusha të rëndësishme, si:

-  Sistemi i komandimit dhe kontrollit,
-  Sistemi i informacionit, duke përfshirë sistemet e vëzhgimit të hapsirës detare e ajrore, si dhe sigurimin e sistemeve e pajisjeve të tjera të zbulimit,
-  Sistemet e pajisjet për mbrojtjen e trupës,
-  Sistemet e pajisjet për vetmbështetjen e trupës,
-  Mjetet e pajisjet që sigurojnë manovrën dhe transportin e trupave,
-  Armatimi.

Modernizimi i sistemeve dhe pajisjeve synon:

-  Unifikimin e standardeve në pajisje, teknikë, sisteme, drejt krijimit të kapaciteteve ushtarake të njësuara me vendet anëtare të NATO,
-  Sigurimin e ndërveprueshmërisë së sistemeve dhe pajisjeve të FA me ato që disponojnë strukturat e tjera shtetërore dhe vendet e Aleancës nëpërmjet kombinimit dhe përputhshmërisë së tyre,
-  Zhvillimin e kapaciteteve operacionale të FA për të kryer misionin dhe detyrat e tyre brenda vendit, si dhe për të qenë të afta për t’u dislokuar dhe marrë pjesë në operacione ndërkombëtare.

Koncepti pёr pajisje dhe modernizim mbёshtetet nё dokumentet kryesore strategjikë si:

-  Strategjia Ushtarake,
-  Plani Afatgjatё i Zhvillimit të FA Vizion 2020,
-  Tabelat e Organizimit dhe Pajisjeve (TOP),
-  Direktiva e Ministrit të Mbrojtjes 2008-2013, mbi bazën e të cilëve është parashikuar ndërtimi i Forcës së Ardhshme Profesioniste.

Procesi i Modernizimit të FA mbështet objektivat dhe përparësitë afatshkurtëra, afatmesme dhe afatgjata të ristrukturimit dhe zhvillimit të tyre duke synuar arritjen e kapaciteteve operacionale të kërkuara.

Baza Ligjore

Krijimi i bazës ligjore për Modernizimin e Forcave të Armatosura është konsideruar përparësi. Në mbështetje të Nenit 5, pika 2, të Ligjit “Për Prokurimin Publik” është miratuar me Vendimin e Këshillit të Ministrave Nr.1403, datë 27.10.2008 “Për prokurimet ushtarake”, baza e të cilit është konkurenca, transparenca dhe garantimi nëpërmjet procesit të cilësisë së sistemeve dhe teknikës në interes të Forcave të Armatosura