Zhvillohet ceremonia e 6 - vjetorit të anëtarësimit të Shqipërisë në NATO dhe e prezantimit të armatimit të ri M4, me të cilin do të kompletohen efektivat e Batalionit të Dytë të Këmbësorisë (b2k). Në këtë aktivitet, i cili u zhvillua ne ambientet e Batalionit të Forcave Speciale dhe Batalionit Komando në Zall - Herr, morën pjesë: kryeministri i Republikës së Shqipërisë, z. Edi Rama, ministrja e Mbrojtjes, znj. Mimi Kodheli, ambasadori i SHBA në Tiranë, z. Donald Lu, shefi i Shtabit të Përgjithshëm i FA, gjeneralmajor Jeronim Bazo, deputetë të Kuvendit të Shqipërisë, gjeneralë dhe ushtarakë të lartë të Ministrisë së Mbrojtjes, Shtabit të Përgjithshëm dhe Forcave të Armatosura, atashe ushtarakë dhe përfaqësues të tjerë të trupit diplomatik të akredituar në vendin tonë, si dhe mjaft të ftuar të tjerë.
Në fjalën e saj të përshëndetjes ministrja e Mbrojtjes Kodheli theksoi se, anëtarësimi i Shqipërisë në NATO, gjashtë vite më parë, kurorëzoi përpjekjet dhe punën e gjithanshme të shoqërisë shqiptare dhe forcave të saj të armatosura. Ministrja Kodheli tha se: “Është në interesin tonë që ta mbajmë NATO si një bashkim efikas dhe funksional edhe në të ardhmen. NATO duhet të vazhdojë të jetë elementi bazë i arkitekturës së mbrojtjes evropiane”. Duke iu referuar standardizimit të Forcave të Armatosura, ministrja e Mbrojtjes tha se “sot është dita që në ushtrinë shqiptare të fillojë një rrugëtim pa kthim, ku ne njëherë e përgjithmonë, i themi lamtumirë dhe jo vetëm simbolikisht, armës famëkeqe sovjetike “kallashnikov”, duke e zëvendësuar gradualisht me karabinën M4”.
Në fjalën e tij, kryeministri Rama ndër të tjera theksoi se, mirënjohja i shkon anëtarëve të Aleancës së Atlantikut të Veriut, i shkon popujve dhe qeverive të tyre që duke hapur dyert për Shqipërinë i dhanë popullit tonë të drejtën për t’u ndjerë të barabartë në një tryezë me kaq shumë vendimmarrje botërore. Kryeministri u shpreh gjithashtu se: “Shqipëria dhe shqiptarët kudo që ndodhen do të jenë mirënjohës për rolin që NATO ka luajtur duke i dhënë fund luftërave në rajonin tonë. Shqipëria e meriton vendin që ka në tryezën e lartë të vendimmarrjes së Aleancës së Atlantikut të Veriut. Sot 6 vjet pas anëtarësimit në NATO sfidat e Aleancës janë shtuar: agresioni rus në Ukrainë, valët e një barbarie të dhunshme në formën më diabolike të terrorizmit janë shtruar përpara nesh si pjesë në NATO, por dhe aleancë unike e lirisë me një nevojë të madhe për të riorganizuar të gjitha politikat për të përshtatur politikat tona në këto kushte”, tha kryeministri Rama.
Ndërsa ambasadori i Shteteve të Bashkuara të Amerikës, Donald Lu duke shprehur suksese të vazhdueshme për forcimin e Aleancës së Atlantikut të Veriut, por dhe për forcimin e Forcave të Armatosura të Shqipërisë, theksoi se, Shqipëria, pavarësisht se është vendi më i vogël i NATO, mbetet vendi më entuziast për praninë në të.
Më pas trupat e Batalionit të Dytë të Këmbësorisë të pajisur me armatimin e ri, pushkë karabina M4 dhe pistoleta Beretta “Px4 Storm” dhe ato të Batalionit Special realizuan një varg demonstrimesh ushtarake si: qitje nga distanca të afërta; qitje me pengesa; qitje me snajper; rënie në zjarrin e armikut dhe shkëputja prej tij; lirim pengjesh duke vepruar nga toka dhe ajri, ku morën pjesë një helikopter Cugar dhe BO i Bazës Ajrore të Farkës etj. Në këto demonstrime ra në sy disiplina, përkushtimi dhe profesionalizmi i lartë i trupave pjesëmarrëse, si dhe kompaktësimi i veprimeve sipas kërkesave dhe standardeve të NATO. Në fund, kryeministri Rama, ministrja Kodheli, ambasadori amerikan në Tiranë Lu dhe personalitetet e tjerë bënë një foto të përbashkët me trupat pjesëmarrëse në këtë ceremoni.
Fjala e plotë e ministres së Mbrojtjes znj. Mimi Kodheli për 6 - vjetorin e anëtarësimit në NATO
© Ministria e Mbrojtjes 2024 - Të gjitha të drejtat e rezervuara.