FA vijojnë angazhimin në operacionin për shuarjen e zjarreve

zjarre100815

Edhe në këto ditë të nxehta të muajit gusht forca dhe mjete të Forcave tona të Armatosura kanë vijuar të angazhohen për shuarjen e vatrave të zjarreve që kanë rënë në zona të veçanta të vendit dhe u kanë ardhur në ndihmë banorëve të tyre që rrezikoheshin nga kjo situatë. Kështu, me datë 9 gusht 2015, për disa orë rresht, nga ora 5:00 deri në 16:20, 20 forca dhe një mjet transporti të Batalionit të Këmbësorisë në Vaun e Dejës në vartësi të Forcës Tokësore, u angazhuan në operacionin për shuarjen e zjarrit që kishte rënë në afërsi të fshatit Kaçinar të ish-komunës Kolsh, të prefekturës së Lezhës.

Gjithashtu, në këtë operacion u përshi edhe një helikopter, BO-105, i Bazës Ajrore në Farkë, i cili nga ora 11:30 - 13:40 kreu fluturime dhe mori pjesë në fikjen e zjarrit të rënë në këtë zonë.
Ndërkaq, Forcat e Armatosura, struktura, forca dhe mjete të saj, janë në gatishmëri të plotë për t’iu përgjigjur në çdo moment emergjencave civile që mund të krijohen edhe në të ardhmen nga zjarret.