Ministrja Mbrojtjes, znj. Mimi Kodheli, prezantoi Direktivën e Mbrojtjes për vitin 2016. Në këtë prezantim ishin të pranishëm: shefi i Shtabit të Përgjithshëm i FA, gjeneralmajor Jeronim Bazo, komandantët e forcave, gjeneralë, drejtorë dhe ushtarakë të
lartë të Ministrisë së Mbrojtjes, Shtabit të Përgjithshëm të FA etj.
Më poshtë prezantimi i Direktivës së Mbrojtjes për vitin 2016 nga ministrja e Mbrojtjes, znj. Mimi Kodheli.
DIREKTIVA E MBROJTJES 2016
I. HYRJE
Ndryshimet dramatike në mjedisin e sigurisë dhe gjeopolitikës, ku kriza ekonomike, sulmet terroriste, zhvillimet në kufijtë lindorë dhe jugorë të Aleancës dhe emigracioni masiv, ndërthuren dhe krijojnë skenarë të rrezikshëm për vendin dhe aleancën.
Për këtë, kërkohet vlerësim real i gatishmërisë së FA, me qëllim kontributin në rritjen e paqes e stabilitetit në vend, Aleancë, rajon e më gjerë. Nisur nga realiteti gjeopolitik, sfidat e mbrojtjes për vitin 2016 vijojnë të mbeten modernizimi dhe zhvillimi
i kapaciteteve të afta për t'ju përgjigjur sfidave strategjike në përputhje me angazhimet e vendit tonë, zbatimi i dokumenteve strategjikë, hartimi i doktrinave, rritja e ndërveprueshmërisë, menaxhimi efektiv i burimeve të mbrojtjes, rritja e dinjitetit
të ushtarakëve, si dhe lufta pa kompromis kundër korrupsionit.
II. PRIORITETET KRYESORE PËR VITIN 2016
1. Rritja e ndërveprueshmërisë dhe operacionalitetit;
2. Përmbushja e angazhimeve në kuadër të Aleancës;
3. Modernizimi i kapaciteteve dhe vijimi i përmirësimit të infrastrukturës së FA;
4. Mirëmenaxhimi i burimeve të mbrojtjes dhe përmirësimi i mbështetjes për ushtarakët;
III. DREJTIMET KRYESORE TË PUNËS PËR VITIN 2016
Drejtimet ku do të fokusohet veprimtaria e strukturave të Ministrisë së Mbrojtjes dhe Forcave të Armatosura, për vitin 2016 do të jenë:
1. Zbatimi i dokumenteve strategjike: Strategjia Ushtarake (SU) dhe Plani Afatgjatë
i Zhvillimit të FA 2016-2025, kanë krijuar një kuadër të ri konceptual e normativ, i cili do të orientojë dhe përshpejtojë transformimin e mbrojtjes. Të gjitha strukturat sipas fushave të veprimtarisë së tyre, të harmonizojnë objektivat e tyre me ato
strategjike, të hartojnë e përmirësojnë planet e veprimit dhe ato mbështetëse dhe të ndjekin e raportojnë me rigorozitet përmbushjen e tyre.
2. Planifikimi: Procesi i planifikim-programimit në përmbushje të prioriteteve, të
harmonizohet me planifikimin e mbrojtjes së Aleancës, në zbatim të paketës së Objektivave të Kapaciteteve (CT). Nisur nga koncepti i “një seti të vetëm forcash”, të planifikohet dhe programohet zhvillimi i kapaciteteve të luftimit, mbështetjes së luftimit
dhe mbështetjes me shërbime të luftimit, të cilat janë detyrim për aleancën (CT). Të planifikohet dhe shtrihet në vite përmbushja e kritereve të përdorueshmërisë dhe dislokueshmërisë së FT dhe të përfshihen elementët e grup-batalionit në programet e
modernizimit.
Të rriten njohuritë mbi procesin e planifikim-programimit, të hartohen programet e mbrojtjes sipas afateve dhe prioriteteve, të rishikohet lista e integruar e prioriteteve dhe programet e modernizimit për periudhën afatmesme. Drejtuesit
e strukturave të vlerësojnë me përparësi procesin e planifikimit duke u angazhuar personalisht në përmbushjen e detyrimeve dhe përmirësimin e bashkëpunimit midis të gjitha strukturave të FA/MM. Gjatë vitit 2016, të vijojnë programet shumëvjeçare dhe
të nisin programet e reja për përmirësimin, zhvillimin, trajnimin, stërvitjen, dislokimin dhe mëvetësinë e kapaciteteve të FA.
3. Zhvillimi i kapaciteteve: Kapacitetet e FA të përmirësohen dhe zhvillohen në përmbushje të misionit
e detyrave, SU dhe sipas konceptit të Aleancës për zhvillimin e kapaciteteve.
3.1. Prioritet kryesor të jetë zhvillimi i Grup-Batalionit (GB)me të gjithë elementet e tij, për ta vënë në dispozicion të operacioneve të NATO-s
në afatet e kërkuara. Fokusi të jetë batalioni i dytë i këmbësorisë dhe në kontributet e deklaruara në NRF/VJTF. Të vijojnë programet për kompletimin e b2k me personel, pajisje kritike dhe pajisje mbështetëse. Të intensifikohen stërvitjet për të arritur
nivelin e kërkuar të gatishmërisë duke kontribuar në të gjithë spektrin e operacioneve të NATO-s, të fokusuar në zbatimin e Planit të Gatishmërisë për Veprim (RAP). Të hartohen planet e zhvillimit të elementëve mbështetës të grup-batalionit të këmbësorisë,
dhe të hartohen apo rishikohen konceptet, kërkesat operacionale, propozimet teknike dhe projektet e reja, realiste dhe ambicioze për menaxhimin më efikas të burimeve në dispozicion. Të hartohen projektet e modernizimit me fokus rritjen e lëvizshmërisë,
nivelit të mbrojtjes, fuqisë së zjarrit dhe zhvillimin e kapaciteteve mbështetëse për GB dhe për FT.
3.2. Të përmirësohen kapacitetet për vëzhgimin e hapësirës detare, kapacitetet reaguese dhe kapacitetet e patrullimit dhe
ndalimit detar (boardingut). Të rritet sasia e orëve të patrullimit dhe të vlerësohet efektiviteti i tyre përkundrejt objektivave të synuar.
3.3. Të mbahen në gatishmëri operacionale helikopterët, personeli dhe kapacitetet
e FAj. Të rriten kapacitetet trajnuese dhe orët e fluturimit të pilotëve dhe kapacitetet për Vëzhgimin e Hapësirës Ajrore duke modernizuar Qendrën e Kontroll-Raportimit (QKR).
3.4. Të përmirësohen kapacitetet për sigurinë
dhe mbrojtjen kibernetike.
4. Gatishmëria dhe operacionaliteti: Forcat e Armatosura, të përmirësojnë dhe mbajnë gatishmërinë për të reaguar dhe marrë pjesë në operacione në kohë paqe, krize dhe lufte. Të përcillet për miratim
rregullorja e re e gatishmërisë, e cila të harmonizojë nivelet dhe normat e gatishmërisë së FA, me ato të NATO-s. Komandantët e forcave, të rrisin gatishmërinë e njësive dhe të zbatojnë në kohë programet për pajisjen, stërvitjen dhe modernizimin e tyre.
Të përmbushet niveli i ambicies kombëtare dhe angazhimit për kontribute në operacionet e drejtuara nga NATO, BE dhe OKB.
5. Modernizimi: Pajisja e njësive të deklaruara në NATO, me armatim të lehtë të këmbësorisë, është guri
i themelit të një ere të re në modernizimin e FA. Të vijojnë zbatimi i programeve shumëvjeçare të modernizimit sipas prioriteteve, në blloqe të veçanta, për zhvillimin e kapaciteteve specifike të FA, përmbushjen e Objektivave të Kapaciteteve dhe rritjen
e ndërveprueshmërisë. Të vazhdojnë projektet e automatizimit të mbrojtjes, pajisjes me armatimin e lehtë të këmbësorisë, pajisja me mortaja 60mm dhe 81mm, kompletin individual të luftimit, pajisjet e MADM, pajisjet EOD për togën NRF, pajisjet për zbulimin,
pajisjet speciale për temperatura ekstreme, pajisjet mjekësore, mjetet e transportit, si dhe rritja e kapaciteteve për operacione në mbështetje të popullsisë civile, sigurimi i mirëmbajtjes për helikopterët dhe rritja e kapaciteteve biometrike në FA.
6. Rritja e ndërveprueshmërisë: Gjatë 2016, ndërveprimi të jetë prioritet për rritjen e gatishmërisë dhe përmirësimin e aftësive, për të operuar së bashku me aleatët në përmbushjen e objektivave taktike, operacionale dhe
strategjike. Të hartohen plane dhe të punohet njëherazi në të gjithë elementët e saj si në: doktrina, strukturë, trajnim e stërvitje, pajisje e sisteme, procedura, komunikim, dhe infrastrukturë.
6.1. Standardizimi: Të jetësohet
ky proces duke përzgjedhur, ratifikuar dhe implementuar STANAG/AP-të e Aleancës, të cilët mbështetin paketën e Objektivave të Kapaciteteve, prioritetet e FA dhe programet e modernizimit. Standardizimi të jetë në funksion të rritjes së ndërveprimit midis
njësive dhe kapaciteteve të FA, për të marrë pjesë në operacione të drejtuara nga NATO, BE, OKB apo në koalicione të tjera.
6.2. Stërvitja: Të rritet efektiviteti i stërvitjes për aftësimin e individëve, trupave dhe shtabeve,
për kryerjen e operacioneve ushtarake dhe jo ushtarake, brenda e jashtë vendit. FA, me njësitë e deklaruara në NRF/VJTF, të marrin pjesë në stërvitjet e Aleancës, të cilat të shërbejnë edhe si platforma të vlerësimit, certifikimit dhe afirmimit të këtyre
njësive. Të rritet përdorimi i simulimit në trajnim dhe stërvitje, të rishikohet plani i stërvitjeve kombëtare që do përfshihen në programin e Trajnimit dhe të Stërvitjes së NATO-s, të zgjerohet pjesëmarrja në stërvitjet rajonale dhe dypalëshe, si dhe
stërvitjet e hapura për vendet rajonale.
Të zhvillohen stërvitje ndërinstitucionale për përballimin e emergjencave civile dhe luftën kundër terrorizmit, me qëllim rritjen e kapaciteteve të FARSH, për përmbushjen e detyrimeve në shërbim të qytetarëve
dhe në mbështetje të autoriteteve civile, si dhe në kuadër të rolit të shtuar të FA.
6.3. Arsimimi të plotësojë nevojat e FA për burime njerëzore të afta dhe kompetente, në të gjitha nivelet, specialitetet dhe kategoritë e
personelit duke shfrytëzuar mundësitë e FA dhe ato bilaterale. Të vijojë rishikimi dhe përmirësimi i programeve e planeve mësimore dhe të modernizohet procesi mësimor duke aplikuar metodologjitë bashkëkohore në mësimdhënie. Të intensifikohet mësimi i
gjuhës angleze, duke përfshirë në kurset e niveleve të larta të lidershipit edhe modulet në gjuhën angleze, njohuritë e së cilës të jenë esenciale për promovimin në gradë, kualifikimin dhe emërimin e personelit.
6.4. Doktrina: Të rishikohet doktrina ushtarake, doktrinat e forcave si dhe rregulloret e manualet për llojet e trupave, armët e shërbimet në FA. Zhvillimi i doktrinës të ketë objektiv përcaktimin e rrugëve dhe mënyrave të përmbushjes së detyrave ushtarake duke lidhur
bashkë teorinë, historinë e praktikat dhe duke nxitur iniciativën dhe mendimin krijues. Institucionet arsimore, sipas nevojave të FA, të zhvillojnë projekte kërkimore dhe studimore me vlera aplikative, në aspektet teorike të artit dhe shkencës ushtarake,
vlerësime dhe analiza për çështjet e sigurisë e mbrojtjes, apo plane në funksion të zhvillimit të kapaciteteve.
7. Pjesëmarrja në misione dhe operacione: FARSH të mbajnë në gatishmëri kapacitetet për pjesëmarrje sipas situatave,
në operacione brenda vendit përfshi edhe mbështetjen e popullsisë dhe autoriteteve civile. FARSH të jenë të gatshme të përmbushin cilësisht angazhimet për kontribute në kuadër të mbrojtjes kolektive (RAP/NRF/VJTF) dhe të materializojnë të gjitha kontributet
e deklaruara për operacionet e drejtuara nga NATO, BE dhe OKB. (RSM, Afganistan, KFOR- Kosovë, ALTHEA -BiH, EUTM Mali dhe Irak). Të sigurohet që personeli ushtarak, që do të dislokohet në operacione të trajnohen, stërviten dhe pajisen për kryerjen me
profesionalizëm të detyrave sipas specifikave dhe kërkesave të operacionit.
8. Bashkëpunimi ushtarak: Bashkëpunimi ushtarak, i harmonizuar me objektivat e politikës së jashtme të RSH, të jetë prioritet i FA, në funksion të
përmbushjes së detyrimeve si vend i NATO-s, zhvillimit të kapaciteteve të mbrojtjes, bashkëpunimit për sigurinë rajonale, si dhe thellimit të besimit, mirëkuptimit dhe intensifikimit të dialogut. FARSH të angazhohen maksimalisht për përmbushjen e detyrimeve
në kuadër të Enhanced NATO Response Force dhe iniciativave të Smart Defence Connected Forces Initiatives, si dhe Framework Nations Concept. Në bashkëpunimin ushtarak me BE, FA të fokusohen në zbatimin e detyrimeve që lidhen me Politikën Evropiane të
Sigurisë dhe Mbrojtjes dhe luftën kundër ekstremizmit të dhunshëm dhe terrorizmit.
Bashkëpunimi ushtarak dypalësh, të bazohet në marrëveshjet dhe planet përkatëse si dhe në mirëkuptimin reciprok të fokusuar në bashkëpunimin e ngushtë me partnerin
strategjik SHBA, me vendet Aleate dhe ato të rajonit, kryesisht në fushat e modernizimit, edukimit, trajnimit dhe stërvitjeve të përbashkëta. Bashkëpunimi ushtarak rajonal të përqendrohet në angazhimin aktiv dhe përfaqësimin cilësor në iniciativat rajonale,
si Karta e Adriatikut, SEDM, RACVIAC, SEESAC. Vëmendje e veçantë t'i kushtohet bashkëpunimit ushtarak me Kosovën.
9. Legjislacioni: Të vijojë hartimi, nxjerrja dhe rishikimi i të gjitha akteve të nevojshëm nënligjore në zbatim
të akteve ligjore të miratuara, duke garantuar zbatimin e plotë të tyre. Të ndiqen detyrimet e anëtarësimit në Bashkimin Evropian, për përafrimin e legjislacionit shqiptar me atë të BE në fushën e sigurisë dhe mbrojtjes.
10. Burimet e Mbrojtjes: Planifikimi kombëtar i mbrojtjes të harmonizohet me atë të NATO-s (NDPP) duke orientuar burimet në përmbushjen e detyrimeve në kuadër të Aleancës.
10.1. Personeli: Të rritet motivimi i personelit nëpërmjet përmirësimit të
pagesës, përkujdesjes, arsimimit, kushteve të punës, menaxhimit dhe sistemit të ndershëm të përparimit në karrierë. Të vijojë reforma duke përmirësuar standardet dhe procedurat e ciklit jetësor dhe aplikimin e praktikave moderne në menaxhimin dhe planifikimin
e karrierës dhe vlerësimin e performancës. Të hartohen politikat dhe procedurat për menaxhimin e personelit sipas specialiteteve dhe të realizohet trajnimi i komandantëve dhe specialistëve të personelit.
10.2. Materialet: Të menaxhohen me efektivitet pajisjet, sistemet dhe materialet në përdorim të FA nëpërmjet sistemit të automatizuar dhe të mirëmbahen sipas kërkesave të gatishmërisë gjatë gjithë ciklit jetësor. Të vijojë programi për modernizimin e teknikës së transportit
të FA.
Të sigurohet mbështetja me shërbime për personelin e dislokuar dhe të sigurohet transporti strategjik për forcat që do të dislokohen jashtë vendit. Të vijojë standardizimi dhe kodifikimi i materialeve për unifikimin e gjuhës dhe arritjen
e ndërveprueshmërisë. Të zhvillohen kapacitetet e mbështetjes shëndetësore duke ri-konsideruar strukturën dhe organizimin e shërbimit, për ruajtjen e shëndetit të personelit
Të hartohen planet e veprimit për demontimin/tjetërsimin e sasive të reja
të municioneve të tepërta dhe jashtë nevojave dhe për trajtimin/eliminimin e materialeve të tepërta.
10.3. Menaxhimi Financiar: Burimet Financiare të FA, të sigurojnë mbështetjen e balancuar midis artikujve buxhetorë, me synim
rritjen e nivelit të shpenzimeve kapitale për modernizim e infrastrukturë, duke mbështetur njëkohësisht prioritetet e përcaktuara në SU. Objektivat e kapaciteteve, të përfshihen në listën e integruar të prioriteteve edhe në programet e mbrojtjes dhe
të shtrihen në kohë buxhetimi i tyre. Të vlerësohen dhe shfrytëzohen mundësitë për financim të projekteve nga donatorët.
Të rritet efektiviteti i përdorimit të burimeve financiare nëpërmjet shfrytëzimit të sistemit të menaxhimit të burimeve të
mbrojtjes, ndërsa efiçenca në menaxhimin e buxhetit, të arrihet duke rishikuar prioritetet dhe sipas tyre të hartohen në kohë projektet për të realizuar programimin.
10.4. Infrastruktura: Të investohet për të përmirësuar
kushtet e jetës, punës dhe stërvitjes së personelit si dhe infrastukturën e rajoneve stërvitore. Të vijojë trajtimi i pronave jashtë Planit të Përhapjes dhe Vendosjes nëpërmjet privatizimit, qiradhënies, transferimit, si dhe aplikimi për certifikatë
pronësie të çdo prone në administrim të MM.
11. Përkujdesja: Fokusi të jetë në kapacitetet njerëzore, duke siguruar profesionalizmin, shanse të barabarta si dhe motivimin e ushtarakëve, për t’u ndjerë dinjitozë përkrah Aleatëve.
Kjo të arrihet, duke planifikuar nevojat, vlerësimin real të performancës, trajtimin, mbështetjen dhe përkujdesjen e vazhdueshme për ushtarakët, gjatë gjithë ciklit jetësor. Të shqyrtohen mundësitë për mbështetjen e personelit civil me kredi të buta
për strehim. Pagesat, kompensimi, strehimi dhe përkujdesja shëndetësore për personelin ushtarak aktiv dhe rezervë, të bëhet sipas akteve ligjore e nënligjore duke synuar përmirësimin e tyre. Kujdes të tregohet ndaj familjeve të ushtarakëve që dërgohen
në operacione jashtë vendit. Perspektiva gjinore të shihet si pjesë integrale e politikave dhe planeve të Ministrisë së Mbrojtjes.
IV. PËRFUNDIME
Në zbatim të kësaj direktive, kërkoj nga Shtabi i Përgjithshëm, Komandantët
e Forcave dhe ato Mbështetëse, Drejtoritë në Ministrinë e Mbrojtjes dhe Shtabin e Përgjithshëm të Forcave të Armatosura dhe strukturat vartëse të Ministrisë së Mbrojtjes dhe Shtabit të Përgjithshëm, të hartojnë plane e programe konkrete veprimi në zbatim
të detyrimeve që rrjedhin nga kjo direktivë, si dhe të marrin të gjitha masat për realizimin në kohë e me cilësi të tyre.
