Ministri Vengu, në Konferencën e Mbrojtjes Kibernetike të NATO-s: Shqipëria do të rrisë investimet në këtë fushë për sigurinë e Aleancës

Ministri i Mbrojtjes Pirro Vengu, mori pjesë në Konferencën e Mbrojtjes Kibernetike të NATO 2025, e cila u zhvillua në Tiranë dhe mblodhi së bashku gjeneralë, komandantë, drejtues të lartë të Aleancës, si dhe ekspertë ndërkombëtarë në fushën e Sigurisë Digjitale.

Në fjalën e tij përpara pjesëmarrësve, ministri Vengu theksoi rëndësinë strategjike të Mbrojtjes Kibernetike në kohën kur hapësira digjitale është kthyer në një ndër dimensionet më kritike të sigurisë kolektive. Ai vuri në dukje nevojën për shtim të kapaciteteve, thellim të bashkëpunimit mes vendeve anëtare dhe koordinim të avancuar në përballimin e sfidave të reja kibernetike: “Shqipëria ka bërë hapa të rëndësishëm në këtë drejtim, përmes krijimit të Komandës Kibernetike, forcimit të kapaciteteve kombëtare dhe rritjes së ndërveprimit me strukturat e NATO”, - u shpreh ministri Vengu, duke theksuar se vendi ynë do të vijojë të investojë dhe të forcojë rolin e tij në këtë fushë jetike për sigurinë kombëtare dhe atë të Aleancës.

Konferenca e Mbrojtjes Kibernetike e NATO-s 2025 u zhvillua për herë të parë në Shqipëri nën kujdesin e Autoriteti Kombëtar për Sigurinë Kibernetike, si një platformë strategjike për shkëmbimin e ekspertizës ndërmjet Aleatëve dhe për avancimin e politikave të përbashkëta në mbrojtjen e hapësirës digjitale.

Artikuj nga Newsroom