Një urë “bailey” edhe pranë fshatit Katund i Vjetër, Rubik

e premte, 29 janar 2016 17:43

Foto Galeri

Reshjet e dendura që ranë gjatë muajit janar, përveç përmbytjeve në shumë zona, sollën edhe shkatërrimin e disa urave në vendin tonë. Një prej tyre ishte dhe ajo pranë fshatit Katund i Vjetër, Njësia Administrative Rubik, Bashkia Mirditë, e cila vështirësoi ndjeshëm lëvizjen e banorëve të disa fshatrave si Kaçinar,Velë, Bulger, Kryezesë etj. U desh ndërhyrja e forcave të Batalionit të Xhenios, 8 forca dhe 5 mjete të ndryshme, të cilët në kohë rekord, brenda 5 ditëve, bënë të mundur ndërtimin e bazamentit të këmbëve të urës, si dhe ngritjen e urës “bailey”. Vlen për t’u përmendur edhe angazhimi i banorëve të zonës, të cilët krahpërkrah me forcat xheniere të FA ndihmuan në ndërtimin e kësaj ure.

Me rastin e përfundimit të urës ishte e pranishme ministrja e Mbrojtjes Kodheli, e cila shoqërohej nga shefi i Shtabit të Përgjithshëm i FA, gjeneralmajor Jeronim Bazo, komandanti i Komandës Mbështetëse, kolonel Fatmir Lokaj, si dhe nga përfaqësues të pushtetit vendor. Ministrja Kodheli, duke përshendetur, theksoi se, edhe në këtë rast FA dhe konkretisht trupat xheniere, u angazhuan seriozisht dhe në një kohë rekord ndërtuan këtë urë, e cila u vjen në ndihmë banorëve të kësaj zone të thellë dhe sidomos fëmijëve që shkojnë në shkollë. Gjithashtu, ministrja Kodheli u tha banorëve që ta gëzoni urën dhe i garantoi se MM dhe FA do të qëndrojnë vazhdimisht pranë komunitetit sa herë që ata do të kenë nevojë për sigurinë e jetës së tyre.

Ura “bailey” e ngritur pranë fshatit Katund i Vjetër, Rubik, ka një gjatësi prej 12 metra dhe peshëmbajtje 25 ton, si dhe do të lidhë mbi 1000 banorë të kësaj zone.