Gjenerallejtënant Hodges: Shqipëria anëtar mjaft besnik i NATO. Jam krenar që ushtarakët shqiptarë kanë bashkëpunuar ngushtë me ushtarakët amerikanë në operacione të ndryshme.
Zëvendësministri i Mbrojtjes z. Petro Koçi priti sot në një takim komandantin e Forcës Tokësore të Forcave të Armatosura të SHBA për Evropën, gjenerallejtënant Ben Hodges, i cili ndodhet për një vizitë në vendin tonë. Në takim u diskutuan çështje të bashkëpunimit dypalësh, por edhe sfidat e sigurisë me të cilat përballen sot vendet anëtare të NATO në kufijtë lindorë dhe jugorë të Aleancës.
Zëvendësministri Koçi e falënderoi gjenerallejtënant Hodges për mbështetjen dhe kontributin që SHBA kanë dhënë në transformimin dhe modernizimin e Forcave të Armatosura të Shqipërisë përmes ndihmës së drejtpërdrejtë me sisteme e pajisje në krijimin e kapaciteteve operacionale. Më herët komandanti i Forcës Tokësore të Forcave të Armatosura të SHBA për Evropën, gjenerallejtënant Ben Hodges, u prit në një takim edhe nga shefi i Shtabit të Përgjithshëm të Forcave të Armatosura gjeneralmajor Jeronim Bazo. Pas takimit dy gjeneralët dolën në deklaratë para mediave, përmbajtjen e të cilave e gjeni më poshtë:
Deklarata e gjeneralmajor Jeronim Bazo
Mirëdita,
komunikimi me ju përveçse kënaqësi është edhe mundësi për t’i përcjellë publikut informacionin rreth aktiviteteve apo zhvillimeve në Forcat e Armatosura. Sot kjo kënaqësi shtohet pasi në krah kam Gjeneral Ben Hodges, Komandant i Forcave Amerikane në Evropë, por që përtej kësaj ai është edhe një mik i Shqipërisë dhe mik i vjetër i imi.
Që në krye të herës, dua ta falenderoj mikun tim, gjeneral Hodges për vizitën e tij në Tiranë. Për ato që janë kuriozë dua t’ju them se gjeneral Hodges ka qenë edhe më parë në Tiranë, por atëherë si Komandant i Komandës së Komponentit Tokësor të Aleancës. Besoj kjo e certifikon faktin e përmendur më sipër se gjenerali është mik i Shqipërisë.
Vizita të këtij niveli janë gjithmonë të rëndësishme por të vendosura në kontekstin përkatës ato bëhen akoma më të rëndësishme.
Për të thënë gjërat e para të parat: Jam i bindur se ndajmë të njëjtin mendim se ishte një takim i frytshëm, që na dha mundësinë të ndajmë drejt për drejtë vlerësime, opinione, konstatime dhe qëndrime, që lidhen me bashkëpunimin dypalësh, por edhe të diskutojmë rreth sfidave të sigurisë në mjedisin e sotëm strategjik dhe në mënyrë të veçantë me sfidat që përballet Aleanca jonë e përbashkët.
Në kontekstin rajonal, sollëm në vëmendjen e bashkëbiseduesit rolin që ka luajtur e luan përmes iniciativave të tilla si “Adriatik Charter” e njohur si A5, Iniciativa e Shefave të Shtabeve të Përgjithshëm të Ballkanit, e njohur si B9, Brigada Shumëkombëshe e Evropës Juglindore, për të rritur frymën e bashkëpunimit mes vendeve të rajonit, si mënyra më e mirë për të rritur sigurinë në rajon.
E sigurova Gjeneral Hodges, se Shqipëria po ndjek me kujdesin e duhur zhvillimet në mjedisin e sigurisë dhe në mënyrë të veçantë ato kufijtë lindorë dhe jugor të Aleancës dhe se Forcat e Armatosura të Shqipërisë, në mundësitë e burimeve të tyre, janë aktive me kontribute dhe në masa në kuadër të Planit të Gatishmërisë së Aleancës – ndryshe i quajtur Readiness Action Plan. Gjithashtu e informova mikun tim edhe me kujdesin e shtuar nga ana jonë për implikimet që mund të sjellin zhvillimet në kufijtë jugor të Aleancës (vala e emigrantëve).
Bashkëpunimi në fushën ushtarake midis Shqipërisë dhe SHBA është një histori e vërtetë suksesi, mjaft intensive dhe shumë dimensionale. Komanda Amerikane zë një vend të veçantë në këtë marrëdhënie pasi është “kujdestari” i drejtpërdrejtë për materializimin e shumicës së këtij bashkëpunimi. E kam të pamundur të përmend në një kohë të shkurtër gjithçka është bërë në këto vite me mbështetjen e SHBA e në mënyrë të drejtpërdrejtë nga Komanda Amerikane në Evropë.
Por duke e falenderuar mikun tim për gjithçka vendi i tij dhe komanda që ai drejton kanë bërë për Shqipërinë dhe Forcat e saj të Armatosura do veçoja mes tyre mbështetjen për transformimin dhe modernizimin e Forcave të Armatosura përmes ndihmës së drejtpërdrejtë me sisteme e pajisje në krijimin e kapaciteteve operacionale. Një dimension me efekte afatgjatë në transformimin e Forcave të Armatosura ka qenë dhe mbetet ai në fushën e arsimimit dhe kualifikimit të personelit ushtarak dhe civil. Përmes programit IMET zyra e Bashkëpunimit Ushtarak në Ministrinë e Mbrojtjes, ka mundësuar prej dekadash tashmë arsimimin, trajnimin dhe kualifikimin e qindra pjesëtarëve të FA. Me kënaqësi pohoj se jam njëri prej përfituesve të këtij programi.
Me Gjeneral Hodges nuk diskutuam vetëm për çfarë kemi mundur të bëjmë, por ajo që është më e rëndësishme për çfarë synojmë të bëjmë e arrijmë në të ardhmen. Forcat e Armatosura janë në proces të përhershëm transformimi dhe pjesë e këtij procesi është krijimi i kapaciteteve që sigurojnë arritjen e nivelit të ambicies në nivel kombëtar por edhe në kuadër të Aleancës.
Në këtë kontekst i kërkova mikut tim që të kemi vëmendjen, asistencën dhe mbështetjen e Komandës Evropiane për disa prej elementëve më të rëndësishëm të kapaciteteve që duam të krijojmë për të përmbushur paketën e objektivave të Aleancës. Rritja e manovrueshmërisë, mbrojtjes së personelit dhe fuqisë së zjarrit për batalionin apo krijimi i kapaciteteve të zbulimit inteligjencës dhe rikonicionit (ISR) për batalionin e dytë të këmbësorisë, detyrimi jonë kryesor për Aleancën, do të jenë në thelb të bashkëpunimit tonë në të ardhmen. Komanda Amerikane në Evropë përmes EDA (Excess Defense Articles)
Në mbyllje dua të theksoj se Forcat e Armatosura mbeten të angazhuara në arritjen e objektivave të transformimit e modernizimit për të përmbushur dhe vlerësojnë çdo asistencë ndihmë e mbështetje nga Komanda Amerikane në Evropë.
Gjeneral Hodges, përpara se të ju jap fjalën, më lejoni t’ju falenderoj dhe njëherë për vizitën dhe për mundësinë që më krijuat për të ndarë së bashku vlerësime e mendime për rritjen e bashkëpunimit tonë në të ardhmen.
***
Deklarata e gjenerallejtënant Ben Hodges
Faleminderit gjeneral Bazo për mundësinë që më dhatë për të ardhur në Shqipëri.
Mjedisi i sigurisë ka ndryshuar shumë kohët e fundit në Evropë. Kemi rastin e ekstremizmit islamik që është përhapur gjithandej, sidomos nga vendet me origjinë nga Afrika si dhe kemi krizën tragjike të refugjatëve që është aktuale dhe po ashtu dhe invazioni rus dhe pushtimi i Krimesë nga ana e saj e ka ndryshuar shumë mjedisin atje.
Si rrjedhojë NATO, e cila është aleanca më e madhe në botë, është dashur të përshtatet me këto ndryshime të mëdha.
Qendra e rëndesës e NATO-s është lidhja e fortë ndërmjet të gjithë anëtarëve të saj.
Qëllimi kryesor i vizitës time në Shqipëri ishte forcimi i mëtejshëm i kësaj lidhjeje të fortë ndërmjet Shqipërisë dhe SHBA si dy vende anëtare të NATO.
Shqipëria ka qenë një anëtar mjaft besnik dhe e nevojshëm i NATO që në pranimin e saj në këtë organizëm. Ndonëse një vend i vogël Shqipëria ka dërguar një numër të konsiderueshëm efektivësh ushtarakë me përvojë dhe cilësi mjaft të lartë. Jam krenar që ushtarakët shqiptarë kanë bashkëpunuar ngushtë me ushtarakët amerikanë në operacione të ndryshme, përfshirë këtu edhe KFOR.
Mezi pres të rikthehem në Shqipëri në shtator me rastin e stërvitjes tjetër të përbashkët, ku do të ketë pjesëmarrje të ushtarakëve shqiptarë dhe amerikanë.
Arsyeja e dytë që erdha në Shqipëri është të ofroja dhe mbështetjen për ambasadorin amerikan këtu. Ambasada amerikane krijuar në vitin 1938 dëshmon lidhjen e gjatë të bashkëpunimit midis dy vendeve.
Arsyeja e tretë pse ndodhem këtu është të kuptoj sfidat dhe vështirësitë reale me të cilat përballen FA shqiptare.
Samiti tjetër i NATO do të jetë në korrik në Varshavë dhe besoj se synimi kryesor do të jetë shmangia apo parandalimi i agresionit rus në veri, duke mos harruar dhe pjesën jugore.
Pra dhe njëherë arsyeja kryesore pse ndodhem këtu është për t’u njohur me sfidat që ju përballeni dhe se si Amerika mund të japë ndihmesën e saj në këtë drejtim.
Më lejoni ta mbyll fjalën duke shprehur mirënjohjen time për ministren e Mbrojtjes dhe shefin e Shtabit të Përgjithshëm të FA.
Jam i bindur se ministrja dhe shefi i shtabit po bëjnë të pamundurën që ushtarakët shqiptarë të kenë pajisjet më të mira të mundshme në dispozicion, përfshirë këtu dhe trajnimin e tyre.
Shpresoj që të dy ata të vënë theksin tek rëndësia e këtyre burimeve në mënyrë që FA të jenë më të mirëpajisura.
