Forcat e Armatosura angazhohen në shuarjen e zjarreve

200716 zjarre

Forcat e Armatosura të Republikës së Shqipërisë prej disa ditësh janë angazhuar në shuarjen e disa vatrave të zjarrit në Bishan të Vlorës dhe Dhiver, Shëndre, Kullarat dhe Cerkovicë të Bashkisë Finiq.

Në operacionin për shuarjen e flakëve në Bishan të Vlorës u angazhuan 60 efektivë të Shkollës së Trupës në Bunavi, të cilët ndihmuan në lokalizimin e flakëve.

Në zonën e Finiqit, menjëherë pas marrjes së njoftimit për rënien e zjarrit, në ndihmë të operacionit u ngrit një helikopter Cougar i Forcës Ajrore.

Forcat e Armatosura angazhuan gjithashtu edhe efektivët e Detashmentit të Mbështetjes Rajonale të Gjirokastrës, të cilët kanë ndihmuar në mospërhapjen e flakëve.

Zjarri ka djegur sipërfaqe pylli, shkurresh dhe kullotash, por nuk rrezikon banesat e fshatrave Dhiver, Shëndre, Kullarat dhe Cerkovicë.