Vijon angazhimi i FA në shuarjen e zjarrit në malin e Shëngjinit dhe në afërsi të "Ranës së Hedhur", Lezhë

Vijon angazhimi i Forcave të Armatosura në terren për shuarjen e zjarrit masiv në afërsi të portit të Shëngjinit dhe tek “Rana e Hedhun”. Në operacion u angazhuan mbi 200 efektivë të Batalionit Vau i Dejës, Batalionit Komando si dhe Komandës së Mbështetjes.

Forca Ajrore u angazhua me dy helikopter për shuarjen e vatrave të zjarrit.

Në mbështetje të operacionit u angazhuan gjithashtu edhe mjete transporti si dhe 2 ambulanca, të gatshme për evakuim banorësh të rrezikuar dhe dhënie ndihme. Njëherësh, 4 mjete zjarrfikëse të Komandës Mbështetëse u angazhuan në operacionin për fikjen e zjarrit.

Pasditen e sotme situatën e ka ndjekur nga afër komandanti i Forcës Tokësore, gjeneral brigade Nazmi Cahani. Gjeneral Cahani u shpreh se po vijon operacioni i Emergjencës Civile për shuarjen e zjarreve në afërsi të portit të Shëngjinit, po ashtu edhe në afërsi të “Ranës së Hedhun”. Në operacion marim pjesë Forcat Tokësore, Batalioni i Vaut të Dejës dhe Batalioni Komando si dhe efektivë nga Komanda Mbështetëse me rreth 100 trupa dhe 4 zjarrfikëse. Më tej gjeneral Cahani theksoi se FA, po mundohet që të parandalojë afrimin e zjarrit pranë qendrave të banuara, ndërkohë që nga ajri është ndërhyrë me helikopter. “Terreni është i vështirë, era e ka bërë edhe më të vështirë misionin e gjithë pjesmarrësve në këtë operacion”.

****

Forcat e Armatosura kontribuan në operacionin për shuarjen e zjarrit masiv që përfshiu pasditen e djeshme malin e Shengjinit në Lezhë, nga i cili rrezikoheshin banesa, por dhe cisterna karburanti, të cilat ndodhen afër portit.

Në këtë operacion u angazhuan mbi 100 efektivë të Batalionit Vau i Dejës dhe Batalionit Komando.

Forca Ajrore u angazhua me një helikopter gjatë pasditës së djeshme. Forcat e Armatosura në bashkëpunim me Emergjencat Civile punuan deri në orët e para të mëngjesit të sotëm, kur dhe u bë e mundur shuarja e zjarrit.

Në mbështetje të këtij operacioni u angazhuan edhe 5 mjete transporti dhe 2 ambulanca, të gatshme për evakuim banorësh të rrezikuar dhe dhënie ndihme. Njëherësh, 4 mjete zjarrfikëse të Komandës Mbështetëse u angazhuan në operacionin për fikjen e zjarrit në malin e Shëngjinit në Lezhë. Aktualisht rreth 20 forca po qëndrojnë në terren për të shmangur mundësinë e riaktivizimit të ndonjë vatre.