Newsroom Forca Ajrore shpëton foshnjen dhe familjen e saj në Burrel, FA vijon operacionin në të gjitha zonat e përmbytura
Forcat e Armatosura vijojnë me intensitet të lartë ndërhyrjen në të gjithë vendin, në ndihmë të banorëve të prekur nga përmbytja për evakuimin dhe shpëtimin e tyre.
Në këto momente sapo përfundoi me sukses të plotë operacioni i kërkim - shpëtimit në Burrel me helikopterin “Cougar” me gjashtë persona në bord.
Forca Ajrore angazhoi një helikopter “Cougar” për operacionin e shpëtimit të një familjeje që kishte mbetur e izoluar nga vërshimi i ujrave në fshatin Zenisht, në Luginën e Matit. Efektivët e Forcës Ajore kanë mundur të shpëtojnë familjen Xhetani në fshatin Zenisht të Matit, përkatësisht një grua shtatzënë, Nertila Xhetani së bashku me foshnjen e saj Adora Xhetani. Ndërsa bashkëshorti i saj, Lek Xhetani, dhe dy prindërit e tij, Medi Xhetani dhe Mile Xhetani nuk kanë pranuar të evakuohen nga banesa, me gjithë insistimin e ushtarakëve në këtë operacion.
Akualisht FA po bëjnë evakuimin e familjeve me probleme në zonën e Fushë Krujës, ku janë aktivizuar 20 forca, mjete të kalueshmërisë së lartë si dhe motorbarka shpëtimi.
Në Tiranë, në zonën e Urës së Babrusë po punojnë 10 trupa, mjete dhe motorbarka shpëtimi.
Ndërhyrje ka dhe tek Pallati me Shigjeta me 10 forca, motopompa dhe mjete të tjera shpëtimi, si dhe në zonën e “City Park” me 10 forca dhe mjete zjarrfikëse.
Ndërkohë që në Qarkun e Lezhës Forcat e Armatosura kanë ndërhyrë që në orët e para të mëngjesit me mbi 50 trupa ushtarake, motogjeneratorë të fuqishëm, motopompa, mjete të kalueshmërisë së lartë dhe mbi 500 thasë me rërë.
Efektivët e FA janë të pranishme dhe të gatshme për të ndërhyrë në të gjithë territorin e vendit, aty ku lind nevoja për operacione kërkim - shpëtimi në këtë situatë përmbytjeje nga shirat e shumta.
Forcat e Armatosura të Republikës së Shqipërisë ju bëjnë apel të gjithë qytetarëve shqiptarë që t’i përgjigjen nevojës dhe mbështetjes për lëvizjen e tyre në mënyrë që të shamngin humbjen e jetëve njerëzore.
