Forcat e Armatosura vijojnë nga veriu në jug angazhimin në shuarjen e zjarreve

Forcat e Armatosura të Shqipërisë vijojnë me intensitet të lartë angazhimin në shuarjen e zjarreve që kanë përfshirë disa qarqe të vendit dhe që favorizohen për shkak temperaturave të larta, erës dhe terrenit të vështirë.

Vetëm gjatë ditës së djeshme janë angazhuar 236 forca të Forcave të Armatosura, pjesë e Komandës Mbështetëse dhe Forcës Tokësore, 15 automjete, 4 zjarrfikëse dhe 3 autoambulanca në operacionet për shuarjen e zjarreve.

Numri më i madh i efektivëve të Forcave të Armatosura është angazhuar për shuarjen e zjarrit në fshatin Kuç, Bashkia Vorë, ku kanë marrë pjesë në operacion 96 efektivë, 5 automjete, 3 zjarrfikëse dhe 2 autoambulanca, për shkak se veç sipërfaqes së gjelbër rrezikohet nga flakët edhe një fabrikë fishekzjarrësh.

Forcat e Armatosura janë angazhuar gjithashtu edhe në fshatrat Grapsh, Frashtan, Goricë dhe Jergucat në bashkinë e Dropullit, ku kanë marrë pjesë 45 efektivë si dhe 2 automjete.
Ndërkohë 40 forca të ushtrisë si dhe 2 automjete janë angazhuar në shuarjen e zjarreve në Njësinë Administrative Ulëz, në Bashkinë e Matit.

55 forca, 2 automjete dhe 1 autoambulancë kanë marrë pjesë në operacionin për shuarjen e zjarrit në fshatin Gjinar, Bashkia Elbasan, ku është bërë e mundur vënia nën kontroll e flakëve.

Forcat e Armatosura vijojnë të jenë të angazhuara edhe gjatë ditës së sotme në vatrat ende aktive në disa qarqe të vendit si dhe të gatshme për t’iu përgjigjur çdo situate emergjente.