FA në operacion për shuarjen e zjarreve në Lekas dhe Orosh

Duke ndjekur situatën në mbarë vendin, Forcat e Armatosura të Republikës së Shqipërisë vijojnë pa ndërprerje angazhimin e tyre në shuarjen e zjarreve në të gjitha qarqet e vendit.

Gjatë 24 orëve të fundit, me kërkesë të Drejtorisë së Emergjencave Civile, për të shuar zjarret në disa qarqe janë angazhuar rreth 80 efektivë të ushtrisë (të Komandës Mbështetëse dhe të Forcës Tokësore), 6 mjete transporti dhe 4 zjarrfikëse.

Forcat e Armatosura mbeten të angazhuara në njësinë administrative Lekas (Voskopojë), Qarku Korçë, me rreth 50 efektivë të Komandës Mbështetëse, 3 mjete transporti dhe 4 zjarrfikëse.

Ndërkohë që, 30 efektivë të tjerë të Forcës Tokësore (Zall-Herr) dhe 3 mjete transporti, janë angazhuar në fshatin Orosh, qarku Mirditë.

Aktualisht në mbarë vendin janë 5 vatra zjarri, ku dhe pse situata e zjarreve është nën kontroll, duke mbajtur bashkëpunim të vazhdueshëm me Emergjencat Civile, Forcat e Armatosura do të vijojnë të mbeten në gatishmëri dhe gati për të ndërhyrë aty ku do jetë e nevojshme.