Betohet shefi i Shtabit të Përgjithshëm të FA, gjeneral brigade Bardhyl Kollçaku

Është zhvilluar sot në mjediset e Presidencës ceremonia solemne e betimit të shefit të ri të Shtabit të Përgjithshëm të Forcave të Armatosura të Republikës së Shqipërisë, gjeneral brigade Bardhyl Kollçaku.

Të pranishëm në këtë ceremoni ishin presidenti i Republikës së Shqipërisë, z. Ilir Meta, ministrja e Mbrojtjes zonja Mimi Kodheli, drejtues dhe ushtarakë të lartë të Ministrisë së Mbrojtjes dhe Forcave të Armatosura, atashe ushtarakë të vendeve të NATO-s, etj.

Gjeneral brigade Bardhyl Kollçaku shprehu falënderimet nga ana e tij për detyrën e re që iu besua. Në të njëjtën kohë, ai shprehu përkushtimin e tij ndaj përmbushjes me sukses të këtij misioni fisnik.

Presidenti Meta i uroi suksese gjeneral brigade Kollçakut në detyrën e tij. Ai gjithashtu shprehu mirënjohje dhe konsiderata të larta për burrat dhe gratë në uniformë që kanë kontribuar dhe vazhdojnë të kontribuojnë me përkushtim dhe sakrifica të panumërta për mbrojtjen e vendit dhe interesave kombëtare gjatë 105 viteve të shtetit shqiptar.

Presidenti i Republikës falënderoi edhe ushtarakët shqiptarë që janë me mision jashtë vendit si dhe kolegët e tyre që po kontribuojnë me vetëmohim për shuarjen e zjarreve, apo emergjenca të tjera civile në shërbim të qytetarëve tanë.