Qindra banorë të fshatit Muzhakë në Burrel dhe fshatrave përreth, nuk do të kenë më problem lëvizjen e përditshme sidomos gjatë stinës së dimrit.
Forcat e Armatosura përfunduan ndërtimin e një ure tip "bailey", e cila lehtëson ndjeshëm lëvizjen e nxënësve drejt shkollës së fshatit, por edhe banorëve drejt qytetit, qendrës shëndetësore dhe zyrave të njësisë administrative.
Në përfundimin e punimeve të kësaj ure ishte i pranishëm vetë kryeministri i vendit Edi Rama, i cili shoqërohej nga ministrja e Mbrojtjes Olta Xhaçka dhe zëvendësministri Petro Koçi.
Ministrja Xhaçka falenderoi Forcat e Armatosura, jo vetëm për ndërtimin e kësaj ure dhe 5 të tjerave në qarkun e Dibrës, por edhe për angazhimin e tyre në zona të tjera të vendit, si dhe hodhi poshtë çdo akuzë ndaj Forcave të Armatosura.
"Një falenderim për FA-të që bëjnë një punë të palodhur në ndihmë të komunitetit, sigurisht pa zë, pa zhurmë, pa reklamë dhe portale nga ato që bëjnë pis përmes baltaxhinjëve profesionistë të politikës. E vetmja baltë në uniformën e tyre është ajo e punë së palodhur në drejtim të komunitetit. Ura që i dorëzojmë sot 1200 banorëve të Muzhakës dhe të fshatrave përreth, është një urë që i vjen shumë në ndihmë komunitetit, i vjen në ndihmë mbi 300 nxënësve të kësaj zone. Kjo është një nga 9 urat që ne këmi bërë në qarkun e Dibrës edhe falë kësaj pune të jashtëzakonshme, rreth 6 mijë banorë nga Peshkopia nga Bulqiza, Mati edhe nga Klosi e kanë shumë më të lehtë sot, që nxënësit të shkojnë në shkolla, që banorët të aksesojnë qëndat shëndetësore. Të njëtën mundësi e kanë edhe mijëra banorë të tjerë në 39 zona të tjera të thella të izoluara edhe malore ku FA-të kanë dhënë një ndihmë të jashtëzakonshme në ndërtimin e urave të tipit "bailey" si kjo sot, por edhe në sistemimin dhe zgjerimin e rrugëve, atje ku mundësitë e pushtetit vendor kanë shteruar", - u shpreh ministrja Xhaçka.
Nga ana e tij kryeministri Edi Rama u shpreh i kënaqur për lehtësimin e lëvizjes së përditshme të banorëve të kësaj zone, dhe vlerësoi bashkëpunimin me pushtetin vendor.
"Mua më vjen shumë mirë që i kemi çliruar nga ky ankth i madh gjithë ato familje, prindër që kanë sjellë fëmijët në shkollë, duke bërë cirk këtu dhe më vjen shumë mirë po ashtu që jemi në një bashkëpunim shumë të mirë me bashkitë e zonës, me kryetarët e bashkive dhe është një shëmbull i shkëlqyer që kur në terrenin e vështirësive dhe të halleve, të shqetësimeve, të shpresave të njerëzeve, të jemi bashkë të majtë dhe të djathtë të bëjmë ura. Kur pastaj jemi në Paralament i japim kazanit zjarr. Unë jam me urat nuk jam me kazanin dhe më vjen shumë mirë që këtu jemi për një urë, kazani ndërkohë kushedi se çfarë zjen në Tiranë. Sigurisht që nuk është gjithçka, është diçka. Ne do të vazhdojmë të punojmë së bashku me pushtetin vendor."- u shpreh kryeministri.
Ura e ndërtuar në fshatin Muzhakë të njësisë administrative Komsi është e gjatë 21 m, ka një peshëmbajtje prej rreth 30 ton dhe u ndërtua në bashkëpunim me bashkinë e Matit. Gjithashtu ajo është e pajisur edhe me një bankinë për kalimin e këmbësorëve.
© Ministria e Mbrojtjes 2024 - Të gjitha të drejtat e rezervuara.