Kryeministri, Edi Rama dhe Ministrja e Mbrojtjes, Olta Xhaçka falënderuan efektivët e Forcave të Armatosura për angazhimin e tyre në përballjen e situatës së vështirë të shkaktuar nga moti i keq fundjavën e kaluar. Në fjalën e tij, në takimin ku merrnin pjesë përfaqësues të trupit diplomatik dhe familjarë të efektivëve, kreu i Qeverisë ka deklaroi se në buxhetin e vitit 2019 rritja e pagave për ushtarakët do të jetë prioriteti kryesor.
“Angazhohem sot para jush se viti 2018 do të jetë i fundit në të cilin buxhetit i shtetit do të ketë rrogat ekzistuese për ju. Ne jemi të vendosur të rrisim buxhetin e ushtrisë, gjë që e kemi bërë me buxhetin 2018, por rritja do të vazhdojë për të arritur një objektiv. Dhe e para rritje prioritare për vitin 2019 do të jetë rritja e konsiderueshme e pagave të të gjithë ushtarakëve”, ka deklaruar Rama.
Kryeministri u premtoi efektivëve që u përballën me katastrofën natyrore se do të marrin shpërblimin e merituar për këtë angazhim, që sipas tij shpëtoi jetë njerëzish.
Ministrja e Mbrojtjes, Olta Xhaçka vlerësoi se performanca e FA këtë vit ka qenë në një nivel profesional të paprecedent, krahasuar me vitet e mëparshme.
“E emocionuar nga gjithë ç’kam parë me sytë e mi, gjatë këtyre ditëve, për angazhimin vetëmohues të efektivëve të FA, në përballimin e situatës së ditëve të fundit. Ata janë gjithnjë garancia në ditë e natë, në përmbytje e zjarre, duke hapur rrugë e duke ndërtuar ura, duke ju ndodhur pranë çdo njeriu, të dobët e pafuqishëm. Kjo kartolinë sot, është garancia e vërtetë se ky vend ka djem e vajza që i dalin për zot në ditët më të vështira. Forcat e Armatosura do të vazhdojnë të jenë në shërbim të atdheut, me të njëjtin përkushtim, disiplinë e vendosmëri siç kanë punuar çdo herë. Një falënderim i veçantë për ju, nëna, bashkëshorte e fëmijë të ushtarakëve tanë: Jeni mbështetja e tyre në këtë profesion plot sfida”, tha Ministrja në fjalën e saj.
Ministrja e Mbrojtjes vlerësoi punën e prefektëve, si dhe atë të efektivëve të ardhur nga Kosova, të cilët i ka cilësuar si “krahun tjetër të shqiponjës”.
Forcat e Armatosura angazhuan 3 mijë efektivë për përballimin e emergjencës civile pak ditë më parë. Në nderim të punës së tyre, Ministrja e Mbrojtjes, Olta Xhaçka dhe Shefi i Shtabit të Përgjithshëm të FA, general, Bardhyll Kollçaku nderuan me medalje, 7 repartet e përfshira në emergjencë.
U nderuan me “Medaljen e Mirënjohjes” me motivacionin: “Dalluar për kontributin dhe vlerat e veçanta në shërbim të lartësimit të figurës së Forcës së Armatosura”:
1. Reparti Ushtarak nr.3006, Baza Ajrore, Farkë
2. Reparti Ushtarak nr.4030, Batalioni i Mbështetjes Rajonale
3. Reparti Ushtarak nr.4040, Batalioni i Xhenios
Medalje “Reparti i Shquar” me motivacionin: “Për trimëri dhe vendosmëri të lartë gjatë përmbushjes të misionit përmes vështirësive të mëdha”:
1. Reparti Ushtarak nr.1030, Batalioni i Tretë i Këmbësorisë, Poshnjë
2. Reparti Ushtarak nr.5010, Shkolla e Trupës, Bunavi
“Medalje e Luftëtarit” me motivacionin: “Për pjesëmarrje në operacione ushtarake ndërkombëtare” për:
1. Reparti Ushtarak nr.1040, Batalioni Komando
2. Reparti Ushtarak nr.1020, Batalioni i Dytë i Këmbësorisë
© Ministria e Mbrojtjes 2024 - Të gjitha të drejtat e rezervuara.