Ministrja e Mbrojtjes Olta Xhaçka mori pjesë në prezantimin e masave të ndërmarra nga institucionet përgjegjëse për mbarëvajtjen e sezonit turistik veror.
Nga Orikumi ministrja Xhaçka prezantoi masat e ndërmarra nga Ministria e Mbrojtjes dhe kapacitetet që Forcat e Armatosura ofrojnë në përballimin sa më mirë të sezonit turistik veror.
***
Fjala e plotë e ministres Xhaçka:
Besoj se të gjithë biem dakord se Forcat e Armatosura janë shndërruar në një kontribues i rëndësishëm në shumë aspekte të jetës së vendit. Prania e uniformave të gjelbra në ndihmë të komunitetit është bërë tashmë më se e zakonshme dhe më se e mirëpritur.
Vendi ynë po përjeton një rritje të fluksit të turistëve dhe siç është bërë traditë këto vitet e fundit, me hapjen e sezonit turistik veror edhe Ministria e Mbrojtjes e Forcat e Armatosura janë të angazhuara të bëjnë më të mirën e tyre.
MM dhe FA kanë marrë masat e duhura për të vendosur në dispozicion të menaxhimit të fluksit të turistëve, të gjitha kapacitetet e mundshme, duke u ofruar atyre lehtësira për të vizituar parqe turistike në zona nën administrim të FA.
Për këtë qëllim, ne kemi bashkëpunuar me të gjitha strukturat e tjera shtetërore qendrore dhe vendore me të cilat bashkëmenaxhojmë këto parqe.
Përveç këtyre masave, ne, si FA, do të ofrojmë siguri gjatë sezonit turistik nëpërmjet strukturave që disponojmë. Kështu MM, si struktura përgjegjëse për Emergjencat Civile, me strukturat operacionale të FA do të jetë e pranishme për t’iu përgjigjur emergjencave civile sezonale, siç është rënia e zjarreve masive në pyje. Për këtë kemi në gatishmëri në çdo kohë trupa të reagimit të menjëhershëm për ndërhyrje me trupa tokësore, si edhe ndërhyrje nga ajri me anë të helikopterëve të Forcës Ajrore.
Për t’ia dalë mbanë kësaj pune, po bashkëpunojmë ngushtësisht me strukturat përgjegjëse në bashki dhe prefektura për koordinuar masat si dhe për ndërgjegjësimin e popullsinë rreth rrezikut të zjarreve.
Në interes të sigurisë së turistëve vendas dhe të huaj, ne disponojmë kapacitetet tona të kërkim – shpëtimit në mal dhe në det, të cilat do t’ia ofrojmë për t’iu ardhur në ndihmë forcave të rendit në rast aksidentesh.
Gjithashtu, FA ofrojnë evakuim mjekësor ajror, për të përballuar nevojat që mund të lindin.
Edhe njëherë MM e vlerëson sezonin turistik si detyrë të rëndësishme, në aspektin ekonomik, të sigurisë dhe të imazhit të vendit tonë dhe për këtë qëllim është plotësisht e gatshme për të marrë përgjegjësi dhe për të bashkëpunuar me të gjithë aktorët e përfshirë.
© Ministria e Mbrojtjes 2024 - Të gjitha të drejtat e rezervuara.