Shqipëri - Mali i Zi marrëveshje për Policimin Ajror e Emergjencat Civile, Xhaçka: Rrisim sigurinë dhe cilësinë e qytetarëve

e mërkurë, 04 korrik 2018 10:41

Republika e Shqipërisë dhe ajo e Malit të Zi nënshkruan dy marrëveshje bashkëpunimi të ndërsjellë në rastet e emergjencave civile dhe patrullimin e hapësirës ajrore të të dy vendeve.

Nënshkrimi i marrëveshjeve u bë ditën e djeshme në Shkodër, në kuadër të mbledhjes së përbashkët të qeverive të të dy vendeve.

Marrëveshja mbi bashkëpunim dhe ndihmën e ndërsjellë në emergjenca midis Këshillit të Ministrave të Republikës së Shqipërisë dhe Qeverisë së Malit të Zi, u nënshkrua nga ministra e Mbrojtjes Olta Xhaçka dhe ministri malazez i Punëve të Brendshme Mevludin Nuhodžić.

Marrëveshja në rastet e emergjencave civile, synon bashkëpunimin në fushën e parandalimit dhe reagimit ndaj fatkeqësive, si dhe ngritjen e një protokolli të veçantë për dhënien e ndihmës vullnetare në rastin e fatkeqësive në territoret e dy vendeve.

Marrëveshja ndërmjet Këshillit të Ministrave të Republikës së Shqipërisë dhe Qeverisë së Malit të Zi në lidhje me operacionet ndërkufitare të patrullimit ajror, u nënshkrua nga ministrja Olta Xhaçka dhe homologu i saj malazez Predrag Bošković.

Kjo marrëveshje ka për qëllim krijimin e lehtësirave për kalimin pa pengesa apo clearance (lejeve) të avionëve patrullues të NATO në kufirin shtetëror mes Republikës së Shqipërisë dhe Malit të Zi. Kjo, në shërbim të detyrimit që ka Aleanca për të patrulluar dhe kontrolluar hapësirën e saj ajrore.

Pas nënshkrimit të dy marrëveshjeve, ministrja Xhaçka vlerësoi thellimin e bashkëpunimit mes dy vendeve, i cili sipas saj rrit nivelin e sigurisë të dy vendeve tona dhe cilësinë e jetës së qytetarëve të të dy vendeve.