Efektivët e b1k shuajnë zjarrin në malin e Taraboshit
Pas më shumë se 16 orësh, efektivët e Batalionit I të Këmbësorisë (b1k) së Forcës Tokësore në Vaun e Dejës, kanë mundur të fikin zjarrin e ndezur në pjerrësitë e malit të Taraboshit, në afërsi të fshatit Zues të njësisë administrative Rrethina në bashkinë e Shkodrës.
Trupat dhe mjetet e Batalionit të Vaut të Dejës u vunë menjëherë në lëvizje pas kërkesës së pushtetit lokal dhe urdhrit nga Qendra e Bashkuar Operacionale e Forcave të Armatosura (QBO).
Afrimi pranë vatrës së zjarrit nga mjetet zjarrfikëse ka qenë i pamundur për shkak të terrenit të thyer dhe për këtë efektivëve të b1k iu desh të ecnin gati 7 km në errësirë dhe në një terren malor për t’iu afruar flakëve.
Me gjithë ndërhyrjen e trupave ushtarake, zjarri mundi të djegë një hapësirë me pyje e kullota.
Në këtë operacion efektivët e b1k ishin të pajisur me pompa uji shpine, të cilat shërbejnë enkas për zjarre në terrene të tilla.
Artikuj nga Newsroom
e martë, 29 prill 2025
