Efektivë të Batalionit të Dytë të Këmbësorisë (b2kFT) dhe Batalionit “Komando”, të Forcës Tokësore, i janë përgjigjur menjëherë kërkesës së Drejtorisë së Përgjithshme të Emergjencave Civile, për situatën e krijuar nga një zjarr i fuqishëm që ka përfshirë që në orët e para të mëngjesit, një masiv pyjor në fshatin Rrajcë në Përrenjas.
Trupat janë nisur nga Tirana që orën 04:00 dhe kanë filluar menjëherë operacionin për fikjen e flakëve.
Terreni i thepisur malor, ka rritur shkallën e vështirësisë së kryerjes së këtij operacioni, megjithatë trupat e Forcës Tokësore, janë ende në terren duke punuar për izolimin e flakëve të zjarrit dhe fikjen totale të tyre.
Në ndihmë të trupave në tokë, Forcat e Armatosura kanë angazhuar edhe një helikopter Cougar të pajisur me kovë të posaçme për shuarjen zjarreve në terrene të vështira.
Operacioni për shuarjen e flakëve vijon dhe Forcat e Armatosura po dërgojnë të tjerë trupa për të zëvendësuar trupat e angazhuar që në orët e para të mëngjesit.
