Intervista e drejtorit të Drejtorisë së Përgjithshëm të Emergjencave Civile për TV Klan

e martë, 15 janar 2019 12:37

Çako: Drejtoria e Përgjithshme e Emergjencave Civile (DPEC) pranë Ministrisë së Mbrojtjes, Forcat e Armatosura, por edhe të gjitha strukturat vendore, në mënyrë të veçantë prefekturat dhe shtabet e emergjencave përkatëse janë angazhuar për përballimin me sukses të kësaj situate, e cila ndonëse jemi në periudhën e dimrit, jemi në janar, ka një fluks të pazakontë të rënies së dëborës, sidomos në zonat veriore, në zonat e thella malore, siç mund të përmendim Malësinë e Shkodrës, Kukësin, Dibrën, Korçën, Elbasanin, Lezhën, por edhe Gjirokastrën para pak ditësh, e cila vazhdon të mbetet pak problematike në zonat malore, por në tërësinë e saj. Gjirokastra ka kaluar në normalitet falë edhe angazhimit dhe bashkëpunimit të të gjitha strukturave të emergjencave, por edhe strukturave të tjera, të Prefekturës dhe gjithë institucioneve aty.
Por edhe për shkak të ndryshimit të intensitetit të reshjeve të dëborës, shtimit të tyre me dy ditë pak të favorizuara në temperatura dhe në diell, sot ka një rritje të intensitetit të reshjeve jo me ato përmasa që ishte para pak ditësh, ku trashësia e dëborës arriti në vende të caktuara edhe mbi 1 metër.
Vlen të theksojmë se të gjitha rrugët nacionale të kontaktuara nga ARRSH aktualisht janë të hapura. Përfitoj nga rasti të bëj edhe një thirrje mirëkuptimi, pothuajse që të gjithë aktorëve dhe faktorëve që kanë detyrim lidhur me çështjen e zbatimit korrekt të marrëveshjeve, apo detyrave sikurse janë kompanitë kontraktore me ARRSH apo dhe me pushtetin lokal: të rrisin përgjegjshmërinë e tyre, të rrisin kapacitetet e tyre, pasi janë në marrëdhënie me shtetin, janë të kontraktuar pikërisht jo vetëm për mirëmbajtje, por edhe për t'ju gjendur komunitetit, për të zhbllokuar situata të tilla sikurse është kjo e bllokimit të rrugëve nga dëbora.
Jemi në vlerësim dhe në vëmendje të veçantë sidomos për hapjen e rrugëve rurale në njësitë administrative, të cilët nuk jamë hapur ende, banorët kanë vështirësi të konsiderueshme. Gjatë këtyre ditëve kemi pasur një sërë operacionesh në bashkëpunim me Forcat e Armatosura, sikurse ka qenë rasti i Dukagjinit apo rasti i Vlorës. Por jemi në kontakt të vazhdueshëm edhe me Ministrinë e Shëndetësisë, por edhe me të gjitha institucionet e tjera, të cilat duhet të angazhohen maksimalisht dhe për ta përballuar së bashku pasi është një situatë normale, një fenomen që ndodh në dimër. Jemi në kulmin e dimrit. Do të vazhdojmë të jemi në ndikimin e temperaturave të ulëta, disa ditë, pastaj pritet dhe shpresohet qe të rregullohet.

Zoti Çako, kur flasin në fakt për zonat më problematike a mund të na i thoni konkretisht cilat janë ato dhe në cilat zona ende ka rrugë të mbyllura kur flasim për zonat rurale?

Çako: Kryesisht zonat e thella të Dibrës janë ende të bllokuara, të Kukësit, Lura, Selishta, por edhe zonat e Kukësit, në periferi dhe lartësi të konsiderueshme. Dukagjini për Shkodrën, zona të tjera pak a shumë po të njësive administrative të cilat kanë vështirësi por edhe për shkak të rrugëve të cilat nuk janë në parametrat e duhura. Vështirësia për t'i hapur ato është shumë e madhe sepse mjetet borëpastruese nuk mund të punojnë, sepse infrastruktura është shumë e papërshtatshme.

Zoti Çako, pyetje e fundit kjo: kur flasim për masat e ndërmarra nga Shtabi i Emergjencave, konkretisht sa Forca të Armatosura janë angazhuar, mjete borëpastruese apo dhe mjete te tjera? Çfarë kemi konkretisht në këtë aspekt?

Çako: Të gjithë Detashmentet e Forcave të Armatosura, të cilët janë të dislokuar në zonat e caktuara, qofshin në Gjirokastër, në Burrel, në Shkodër, Laç, Vau - Dejës, Tiranë edhe kudo, janë në gatishmëri të plotë pikërisht për këtë. Forcat e Armatosura por edhe forca e tjera operacionale të konsideruara në mbështjetje dhe në zgjidhje të situatave të emergjencës siç është Policia e Shtetit, janë Urgjencat Mjekësore, zjarrfikëset dhe të gjitha forcat e tjera operacionale qe janë në këtë kuadër në bazë të ligjit për Emergjencat Civile.
Janë aktualisht në gatishmëri, mund të themi që në tërësinë e tyre, rreth 2 mijë forca janë aktive dhe vazhdojnë të shërbejnë në periudha të caktuara dhe në vende të caktuara.

Ndërsa për borëpastruese dhe helikopter, ndoshta, nëqoftë se do të jetë e nevojshme?

Çako: Të gjitha kapacitetet e Emergjencave Civile, Drejtorisë së Përgjithshme të Emergjencave Civile dhe të Forcave të Armatosura pothuajse janë vënë në dispozicion. Sigurisht që nuk janë kapacitete pa limit, nuk janë kapacitete që pretendohet se mund të mbulojnë apo mund të zhbllokojnë çdo rrugë rurale të Shqipërisë, në gjithë infrastrukturën e Shqipërisë. Atë që do duhet të bëjnë patjetër dhe një vëmendje të veçantë duhet t'i kushtojnë pikërisht bashkitë, pasi janë njësitë e pushtetit vendor përgjegjëse drejtpërsëdrejti në bazë të ligjit për pushtetin lokal, të cilat duhet ta parashikojnë më përpara çështjen e masave që duhet të marrin, por edhe kontratat që duhet të marrin dhe respektimin rigoroz të kontratave me kompanitë apo me firmat, pasi shumë bashki nuk kanë parashikuar sa dhe si duhet, qoftë sasinë e investimeve që duhet të bëjnë për rastet e emergjencave, por qoftë edhe kontratat mungojnë në shumë rrugë rurale, në njësi administrative, nuk ka kontrata të bëra nga bashkitë.

Ndaj dhe përfitoj nga rasti t'i bëj një thirrje të jenë më të vëmendshëm, pasi i gjithë komuniteti, atje së pari, pret nga pushteti lokal, i cili është votuar për t'i qenë pranë në çdo moment dhe sidomos në kushte të tilla.