Mosdenoncimi në kohë i autorëve të zjarrvënies, na bën të gjithë përgjegjës

Ministria e Mbrojtjes dhe Drejtoria e Përgjithshme e Emergjencave Civile po ndjekin me shqetësim situatën e pazakontë të ditëve të fundit, kur me dhjetëra vatra zjarri kanë përfshirë sipërfaqe të shumta, në disa njësi administrative në thuajse të gjitha prefekturat.

Që prej datës 3 mars e deri më sot, pra në 22 ditë, janë konstatuar 69 vatra zjarri, të cilat kanë djegur 167 hektarë, sipërfaqe me kullota, pemëtari dhe pyje, të konsideruara si zona të mbrojtura, duke sjellë pasoja shumë të mëdha si në ekonomi ashtu edhe në mjedis.

Sipas analizës së bërë nga Drejtoria e Përgjithshme e Emergjencave Civile, në të gjitha rastet, kjo situatë, e cila, e përsëris, është e pazakontë për stinën është shkaktuar në mënyrë të qëllimshme. Të gjitha vatrat e zjarrit janë ndezur nga dora e njeriut, duke synuar djegien e shkurreve, ferrave e barishteve të thata për hapjen e tokave të reja për kullota apo krijimin e hapësirave për ndërtime.

Me keqardhje vërejmë se, përballë një realiteti të tillë, autoritetet vendore mjaftohen vetëm me konstatimin e problemit, apo kërkesat për ndërhyrje nga ajri, ndërkohë që heshtin, kur bëhet fjalë për marrjen e masave parandaluese për raste të tilla, të përsëritura çdo vit, apo akoma më keq, për identifikimin dhe vënien përpara përgjegjësive të shkaktarëve të zjarrit.

Për të gjithë ata drejtues vendorë, qofshin kryetarë bashkish apo kryetarë njësish administrative, të cilët bëjnë veshin shurdh, ju rikujtoj se, bazuar në ligjin për “Për emergjencat civile”, “Ligjin për mbrojtjen nga zjarri dhe shpëtimi”, si dhe të gjitha akteve të tjera ligjore dhe nënligjore, pushteti vendor është përgjegjësi direkt për: organizimin e masave parandaluese, ruajtjen e sipërfaqeve pyjore dhe kullotave dhe identifikimin e vatrës fillestare dhe autorëve me përgjegjshmëri maksimale.

Të gjitha strukturat shtetërore, institucionet e pushtetit vendor dhe komuniteti, jo vetëm që duhet të kontribuojnë në parandalimin dhe eliminimin e këtyre fenomeneve, por edhe të denoncojnë në kohë, të gjithë autorët e zjarrvënies duke e konsideruar atë si një vepër penale, e cila sjell pasoja të rënda për normalitetin e shoqërisë sonë, ekonominë dhe mjedisin.

Çdo neglizhencë në këtë drejtim ju ngarkon me përgjegjësi të drejtpërdrejtë, pasi rrezikohen të krijohen precedentë të rrezikshëm që cenojnë sigurinë e komunitetit dhe pasurisë së përbashkët kombëtare.

Ju bëj thirrje të gjithë punonjësve të administratës vendore apo qendrore, punonjësve të administrimit dhe ruajtjes së pyjeve dhe zonave të mbrojtura, si qytetarëve të denoncojnë në numrat 112, 129 si dhe në nr. +355 69 411 0198 të Qendrës Kombëtare të Emergjencave Civile, çdo individ apo grup individësh që konstatohen në zjarrvënie.

Njëherësh, kërkojmë nga policia e shtetit dhe prokuroria një bashkëpunim më efikas në identifikimin, ndalimin dhe arrestimin e të gjithë autorëve të zjarrvënieve me dashje dhe vënien e tyre përpara përgjegjësisë ligjore.

Strukturat e Emergjencave Civile dhe MZSH në bashki dhe prefektura duhet jo vetëm të angazhojnë kapacitete e tyre, por edhe të sensibilizojnë e ndjekin në kohë marrjen e informacionit, në fazën fillestare të konstatimit të vatrës së zjarrit si dhe të angazhojnë të gjitha strukturat, institucionet, vullnetarët dhe komunitetin.

Nëse secili nga ju bën detyrën dhe zbaton ligji, askush, për interesa personale apo politike nuk do të mund të dëmtojë pasurinë kombëtare e mbi të gjitha të cenojë sigurinë e qytetarëve shqiptarë.

Faleminderit!

VIDEO: