Petro Koçi: Qeveria shqiptare ka rritur mbështetjen për të krijuar një vizion të qartë të bashkëpunimit civilo - ushtarak

e martë, 28 Maj 2019 12:43

Fotogaleria

Konferenca e Drejtuesve Kryesore të Civil - Military Cooperation (CIMIC) të NATO, këtë vit u mbajt në Shqipëri dhe u organizua në mjediset e Ministrisë së Mbrojtjes.
Qëllim i saj është të analizojë se si CIMIC mbështet strategjinë e NATO për të luftuar kërcënimet që shfaqen vazhdimisht.

Gjatë fjalës së tij zëvendësministri i Mbrojtjes, Petro Koçi tha se Shqipëria si anëtare e NATO e vlerëson bashkëpunimin civilo - ushtarak si një nga faktorët kryesorë të konceptit të Mbrojtjes dhe parandalimit të konflikteve të ardhshme të NATO: “Për këtë arsye qeveria shqiptare ka rritur ndjeshëm mbështetjen ligjore, udhëzimet, masat dhe bashkëpunimin midis qeverisë qendrore, pushtetit vendor, aktorëve civilë dhe Forcave të Armatosura për të përcaktuar rolet dhe përgjegjësitë me qëllim formësimin e një vizioni të qartë të bashkëpunimit civilo - ushtarak.

Një rëndësi të veçantë qeveria shqiptare ka treguar me pjesëmarrjen e saj në nismat rajonale dhe bashkëpunimit në përballimin e sfidave, si lufta kundër terrorizmit, emigracionit të paligjshëm, emergjencave civile etj.
Forcat e Armatosura shqiptare kanë luajtur një rol të rëndësishëm në konsolidimin e filozofisë së bashkëpunimit civilo - ushtarak në vend duke transmetuar tek aktorët e tjerë modelin dhe shembullin e pjesëmarjes së suksesshme në parandalimin dhe zgjidhjen e emergjencave, jo vetem brenda vendit, por dhe jashtë saj. Sot, një kontingjent i Forcës Detare shqiptare vepron me sukses në detin Egje në kuadrin e operacionit të përbashkët të NATO-s në parandalimin e fluksit të migrantëve. Vetëm vitin e kaluar FA morën pjesë në operacione të zjarreve, përmbytjeve, ngritje të urave, hapje të rrugëve të reja etj”, - tha Koçi.

Në këtë aktivitet mbajtën fjalën e tyre gjeneral brigade Tonin Marku, në pozicionin e drejtorit të CIMIC në SHAPE si dhe gjeneralmajor Pedersen, DCOS, Partnership Directorate në SHAPE.

Konferenca e Drejtuesve Kryesore të CIMIC të NATO 2019, ku merrnin pjesë rreth 100 përfaqësues nga komuniteti kombëtar i Bashkëpunimit Civilo - Ushtarak dhe Marrëdhënieve me Publikun ka nisur më datë 27 dhe do të zgjasë tre ditë.