Strehim e ushqime për banorët e prekur nga tërmeti në Korçë, të martën Xhaçka në terren

e hënë, 03 qershor 2019 14:12

Ministrja e Mbrojtjes, Olta Xhaçka do të zhvillojë nesër një mbledhje në Shtabin e Emergjencave Civile në Korçë dhe do të vizitojë familjet në fshatrat e prekura nga tërmeti.

Ndërkohë, lidhur me situatën, Ministria e Mbrojtjes përmes Drejtorisë së Përgjithshme të Emergjencave Civile informon se:

Deri më tani Instituti i Gjeoshkencës, Energjisë, Ujit dhe Mjedisit, ka regjistruar rreth 100 lëkundje sizmike në qarkun e Korçës.

Lëkundja më e fortë në datën 02.06.2019, ka qenë ajo e orës 15:34:53, gjerësi gjeografike 40.450 Veri dhe gjatësi gjeografike 20.780 Lindje me madhësi 4 shkallë Rihter, epiqendra 18 km në jug të qytetit Korçës.

Nga informacionet e marra është raportuar se lëkundjet e tërmetit janë ndjerë në zonat përreth epiqendrave, por pa patur dëme materiale dhe në njerëz. Situata vazhdon të jetë nën monitorim të vazhdueshëm.

***

Situata e përgjithshme mbi gjendjen e banorëve në 3 fshatrat e prekur nga tërmeti me madhësi 5,3 shkallë Rihter, e datës 01.06.2019, është si më poshtë:

Nga verifikimi i bërë në 3 fshatra rezultojnë 184 banesa të dëmtuara, prej të cilave 95 të dëmtuara rëndë, pjesa më e madhe e tyre banesa të pabanueshme prej vitesh.

Në fshatin Floq janë sistemuar 160 banorë në 13 çadra me kapacitet deri në 20 vende.
Në fshatin Vidohovë janë ngritur 4 çadra, sipas nevojave të banorëve; janë sistemuar 40 persona dhe nga këta 20 persona në Kishën e fshatit dhe 20 në të afërmit e tyre.
Në fshatin Qafëzezë janë sistemuar 30 persona në 5 çadra të ngritura nga 10 që janë dërguar; në këto dy fshatra disa prej banorëve kanë kërkuar që të strehohen pranë të afërmve të tyre.

Janë dërguar 240 pako ushqimore, 100 thasë me miell, 100 detergjentë. Nga këto 100 pako janë dërguar nga organizata joqeveritare, 100 pako ushqimore nga Drejtoria e Rezervave Materiale të Shtetit për të tre fshatrat dhe, 40 pako nga Kryqi i Kuq për tre fshatra.

Për furnizimin me ujë të pijshëm në fshatin Floq është vënë në dispozicion 1 autobot i Detashmentit të Mbështetjes Rajonale, si dhe bidonë me ujë të pijshëm nga gazsjellësi TAP. Nga TAP është siguruar ushqim ditor për 160 banorë të fshatit Floq.

Shërbimi shëndetësor ka qenë dhe është prezent pranë familjeve të evakuuara dhe ka kryer ndërhyrje në rastet problematike. Në fshatin Floq është ngritur 1 qendër shëndetësore.

Janë angazhuar në total 15 mjete nga të cilat 2 nga Prefektura, 3 nga Detashmenti i Mbështetjes Rajonale, 2 nga Policia e Shtetit, 1 nga Spitali Korçë, 6 nga bashkitë, 1 nga Kryqi i Kuq si dhe grupi vullnetar i Bashkisë Tiranë.

Nga strukturat e FA të Ministrisë së Mbrojtjes në këto 2 ditë janë angazhuar gjithsej në ndihmë të banorëve të zonës 47 forca, 4 mjete dhe 2 zjarrfikëse.

Krahas drejtuesve të bashkisë dhe prefekturës, specialistëve të Emergjencave Civile, të cilët janë në terren që prej momenteve të para, në Korçë situata është ndjekur nga afër nga drejtori i Përgjithshëm i Emergjencave Civile, z. Haki Çako, zëvendësministri Petro Koçi dhe disa ministra të ministrive të linjës.