Pas shumë orë përpjekjesh, efektivët e Detashmentit të Mbështetjes Rajonale në Kukës, arritën të shuajnë një vatër të madhe zjarri që përfshiu masivin me pisha në kodrat e njësisë administrative Surroj.
Në operacionin për shuarjen e vatrës së zjarrit morën pjesë zjarrfikësit lokalë dhe punonjës të bashkisë Kukës.
Terreni tejet i thyer pamundësoi ndërhyrjen e mjeteve zjarrfikëse, ndërkohë që temperaturat e larta vështirësuan ndërhyrjen e trupave në terren.
 |
 |
Zjarri në masivin me pisha fillimisht u lokalizua, për t’u shuar plotësisht në orët e mbrëmjes.
Sipas Drejtorisë së Përgjithshme të Emergjencave Civile, gjatë muajt gusht, deri më datë 21 gusht 2019, në mbarë vendin janë regjistruar 83 vatra zjarri, ku janë angazhuar rreth 100 mjete, dhe rreth 800 forca, ku përfshihen zjarrfikësit, Forcat e Armatosura, punonjës të bashkive, por edhe vullnetarë.
Në total janë djegur rreth 617 ha shkurre, ferra, kullota, mes të cilave edhe 130 ha pishë.
Vlen për t’u theksuar se nga 83 vatra, vetëm 1 raportohet si e qëllimshme, pjesa tjetër e zjarreve janë shkaktuar nga pakujdesia apo faktorë të ndryshëm.
