FA izolojnë vatrën e zjarrit në Shëngjin

e shtunë, 24 gusht 2019 10:01

Fotogaleria

Forcat e Armatosura në bashkëpunim me strukturat e tjera shtetërore si zjarrfikësit e Bashkisë Lezhë dhe të Portit të Shëngjinit, forcat e Policisë dhe ndihmën e banorëve kanë izoluar vatrën e zjarrit të rënë në kurorën e gjelbër të qytezës turistike.

Pas dy ditësh punë në terren, 9 mjete zjarrfikëse dhe rreth 200 forca nga këto struktura bënë të mundur eliminimin e rrezikut për qendrën e banuar dhe aktualisht asnjë banesë nuk kërcënohet nga flakët.

Terreni tejet i thyer pamundësoi ndërhyrjen e mjeteve zjarrfikëse, ndërkohë që temperaturat e larta vështirësuan ndërhyrjen e trupave në terren.

Situata në vatrën e zjarrit në Shëngjin është përmirësuar ndjeshëm edhe falë reshjeve të shiut gjatë mbrëmjes së djeshme, ndërkohë që gjithë strukturat e angazhuara mbeten në terren deri në shuarjen e plotë të flakëve.

Drejtoria e Përgjithshme e Emergjencave Civile informon se gjatë këtij muaji, deri më datë 24 janë regjistruar në mbarë vendin 102 vatra zjarri, ku janë angazhuar mbi 110 mjete, dhe rreth 1000 forca, ku përfshihen zjarrfikësit, Forcat e Armatosura, punonjës të bashkive, por edhe vullnetarë.