Tërmeti, kryeministri Rama mbledh strukturat në Ministrinë e Mbrojtjes: Të kontaktohet çdo qytetar në vështirësi

e diel, 22 shtator 2019 14:03

Fotogaleria

Në takimin me prefektë, drejtues të Forcave të Armatosura dhe Emergjencave Civile, e ku merrte pjesë edhe Kryeministri Rama dhe Ministri i Brendshëm Sandër Lleshaj, Ministrja e Mbrojtjes Olta Xhaçka nënvizoi se pas masave të marra për akomodimin e qytetarëve që refuzojnë të hyjnë në banesa, po vijohet me vlerësimin e dëmeve.

“Ka qenë një natë shumë intensive për të gjitha shtabet e emergjencës, bluzat e bardha, forcat e armatosura. Kemi qenë të gjithë në terren për të lehtësuar pasojat e tërmetit dhe ndihmuar njerëzit, që për shkak të panikut dhe dëmtimeve e kanë kaluar natën jashtë. Do bëjmë maksimumin për të akomoduar gjithsecilin. Janë ngritur shumë qendra që mund të presin qytetarët, kryesisht në Tiranë dhe Durrës, por mund të bëhet një punë edhe më e mirë, jo vetëm nga shtabet e emergjencës, por nga të gjithë ne, që askujt të mos i mungojë kujdesi në këto ditë të vështira. të ngremë një orë e më parë grupet e vlerësimit për të vlerësuar dëmin real të tërmetit dhe për të siguruar të gjithë qytetarët se do bëjmë maksimumin për t’i dëmshpërblyer”, tha Ministrja e Mbrojtjes.

Ministri i Punëve të Brendshme Sandër Lleshaj njoftoi gatishmërinë e përforcuar të, jo vetëm të Policisë së Shtetit, por edhe të zjarrfikësve. Ai kërkoi kontaktin me çdo banor dhe të vlerësohet dhe dokumentohet çdo dëm i shkaktuar.
Nga ana e tij kryeministri Edi Rama, i kushtoi rëndësi informacionit, duke i bërë apel qytetareve që janë ende të frikësuar dhe në stres që plasaritjet jo domosdoshmërisht përbëjnë rrezik.

“Çdo plasaritje të inspektohet dhe çdo cenim i dukshëm i çdo pallati të inspektohet, pasi mund të jetë reagimi i 'fugës sizmike', por mund të jetë edhe cenim strukturor që e bën të rrezikshëm. Kështu që unë do të kërkoja si gjë të parë, të gjithë të spostohemi në Durrës, me një synim. Çdo familje që hyn në atë rrethin e parë të stresit dhe që dje gjatë gjithë natës ka qëndruar jashtë të kontaktohet”, nënvizoi Kryeministri.

Sa i përket dëmeve nëpër banesa, kryeministri Rama kërkoi angazhimin e specialistëve të Institutit të Ndërtimit për inspektimin e dëmeve të shkaktuara në strukturat e ndërtesave dhe krijimin e dosjeve për gjendjen e çdo godine.
Gjithashtu, kreu i qeverisë përmendi si një histori suksesi përvojën e fshatrave të Korçës dhe Ersekës, shtëpitë e të cilave po rindërtohen dhe do të jenë gati përpara nisjes së reshjeve.

Më pas mbledhja vijoi nën drejtimin e shefit të Shtabit të Përgjithshëm të FA gjeneral brigade Bardhyl Kollçaku, i cili bashkë me drejtorin e Përgjithshëm të Emergjencave Civile Haki Çako shpërndanë detyrat për të zbatuar urdhrat dhe porositë e lëna nga kryeministri Rama.
-----------------------------------------------------------------
Që prej orës 16:05 kur u regjistrua goditja me magnitudën më të lartë 5.8 Rihter e deri me tani janë shënuar 297 pasgoditje, ku më e ulëta ka qenë 2.9 ballë e shkallës Rihter.
Sipas informacioneve zyrtare paraprake, 132 persona janë paraqitur pranë spitaleve apo qendrave shëndetësore në Tiranë dhe Durrës për të marrë ndihmën e duhur.
Lëkundjet e tokës kanë shkaktuar dëme materiale, sidomos në Durrës dhe Tiranë, por fatmirësisht, ne pjesën dërrmuese bëhet fjalë për krisje të mureve apo dëme të tjera të këtij niveli ndonëse në ditët në vijim serioziteti i këtyre dëmtimeve do të verifikohet nga grupet e ekspertëve në terren.

Konkretisht, sipas raportimeve paraprake që vijnë nga shtabet e emergjencave në prefektura në total janë:

• -569 banesa të dëmtuara

• -53 pallate me dëmtime

• -5 shkolla

• - 1 qendër shëndetësore

• - 1 magazinë

• - 4 automjete

• -1 kabinë elektrike

• -1 urë e varur

Shtabi i Përgjithshëm i Forcave të Armatosura dërgoi 26 forca ushtarake, 3 mjete, duke ngritur 8 çadra. 4 çadra tek qendra pritëse pranë stadiumit “Selman Stërmasi”, 6 çadra tek qendra pritëse në Don Bosko, 1 çadër tek qendra pritëse tek Liqeni i Thatë, 1 çadër tek Bulevardi i Ri.

Gjithsej, në territorin e bashkisë Tiranë janë ngritur në qendrat pritëse 19 çadra të dërguara nga Drejtoria e Përgjithshme e Rezervave Materiale të Shtetit dhe Kryqi i Kuq Shqiptar për strehimin e banorëve me banesa të dëmtuara nga tërmeti.
Në territorin e bashkisë Durrës mbrëmjen e djeshme janë ngritur 2 çadra me nga 40 vende secila të dërguara nga SHPFA. DPRMSH i ka dhënë bashkisë Durrës 40 krevate portative, batanije dhe dyshekë.

VIDEO: