Ministrja Kodheli inspekton stërvitjen e Batalionit të Dytë të Këmbësorisë në rajonin e Zall-Dajtit

Ministrja e Mbrojtjes, znj. Mimi Kodheli, e shoqëruar nga shefi i Shtabit të Përgjithshëm të FA, gjeneralmajor Jeronim Bazo dhe komandanti Forcës Tokësore gjeneralmajor Zyber Dushku, ka inspektuar stërvitjen që po zhvillon Batalioni i Dytë i Këmbësorisë (b2k) i Forcës Tokësore në rajonin e Zall-Dajtit.
Ministrja Kodheli, pasi ka ndjekur nga afër stërvitjen dhe është takuar me trupat pjesëmarrëse, i ka falënderuar ato për arritjet gjatë zhvillimit të kësaj stërvitjeje ushtarake, çka vërteton nënvizoi ajo, edhe një herë më së miri përgatitjen tuaj, gatishmërinë tuaj dhe besimin që ju keni tek puna që ju bëni.

Ju jeni të denjë, ka vijuar më tej znj. Kodheli, për të përmbushur detyrën tonë sa kushtetuese aq edhe fisnike të mbrojtjes së vendit, territorit të Shqipërisë, sigurinë e qytetarëve, të familjeve tona dhe padyshim edhe sigurinë jashtë kufijve të vendit. Gjithashtu, ajo ka falënderuar të gjithë stafin drejtues dhe mbështetës për suksesin e arritur në këtë operacion stërvitor. “Unë uroj dhe shpresoj që edhe në të tjera stërvitje si kjo, ne do të vazhdojmë të dëshmojmë që jemi të denjë të mbrojmë divizën tonë dhe ta ngremë lart betimin tonë që kemi bërë përpara vendit, popullit dhe para vetes sonë”, është shprehur ministrja e Mbrojtjes Kodheli.

Qëllimi i kësaj stërvitjeje është testimi i kapaciteteve operacionale dhe të gatishmërisë së b2k të Forcës Tokësore, si repart prioritar i Forcave të Armatosura, vlerësimi i aftësive për planëzimin, organizimin dhe kryerjen operacionit në kushte sa më reale, si dhe koordinimi dhe bashkëveprimi me strukturat e tjera shtetërore në menaxhimin e emergjencave civile. Stërvitja e kërkim-shpëtimit është karakterizuar nga një dinamikë e lartë dhe një larmi skenarësh, ku trupat e b2k janë angazhuar në përballimin e situatave të emergjencave civile të shkaktuara nga kushtet e rënduara atmosferike.
Në këtë stërvitje marrin pjesë edhe dy helikopterë të Forcës Ajrore, si dhe forca e mjete të Policisë Ushtarake. Trupat dhe mjetet ushtarake gjatë stërvitjes kanë kryer detyra për evakuimin e popullsisë së bllokuar, shpërndarjen e ndihmave ushqimore dhe dhënien e ndihmës së parë mjekësore.