Newsroom Zjarret në vend - AKMC shkresë bashkive dhe Policisë: Merrni masat për parandalim, të ndëshkohen përgjegjësit
Agjencia Kombëtare e Mbrojtjes Civile (AKMC) i ka drejtuar sot dy shkresa respektive 61 bashkive, 12 prefekteve dhe Policisë së Shtetit lidhur me situatën e zjarreve në vend.
AKMC iu kërkon bashkive që të marrin masa të plota për parandalimin dhe minimizimin e dëmeve nga zjarret. Po ashtu iu kërkon edhe prefektëve të përdorin të gjitha kapacitetet operacionale në nivel qarku, për të përballuar këto situata.
“Pushteti vendor të japë informacion në kohë reale për shfaqjen e vatrave të zjarrit. Bashkitë të zhvillojnë trajnime detyruese për punonjësit lidhur me situatat e zjarreve. Bashkitë të mbajnë në gatishmëri dhe të përdorin të gjitha kapacitetet zjarrfikëse. Në bazë të ligjit, Bashkitë, vullnetarët dhe vetë qytetarët, janë kapacitetet për shuarjen e vatrave të zjarrit.”, thuhet në shkresën për bashkitë dhe prefekturat.
Shkresën tjetër AKMC ia ka nisur Policisë së Shtetit, ku kërkohet që të vihen para përgjegjësisë zjarrvënësit.
“Të merren masa për zbulimin e autorëve të zjarreve, qofshin ato me dashje apo dhe nga pakujdesia. Zjarrvënësit të ndëshkohen sipas përcaktimeve të Kodit Penal. Zbulimi i autorëve ul numrin dhe madhësinë e zjarreve. Ndëshkimi i autorëve ndërgjegjëson qytetarët se zjarrëvenia është krim. Kërkohet koordinim me pushtetin lokal dhe kryepleqtë për identifikimin e autorëve. Të ndiqen me prioritet zjarrvëniet duke informuar publikun për autorët e tyre.”, - thekson AKMC në shkresën për Policinë e Shtetit.
