Dhjetëra efektivë të FA “në luftë” me zjarret, Xhaçka: Nuk do kursehet askush që dëmton pyje e kullota

020

Dhjetëra efektivë të Forcave të Armatosura janë prej ditësh e netësh të angazhuar për shuarjen e zjarreve, që kanë përfshirë sipërfaqe të tëra pyje e kullota në tetë qarqe të vendit. Ministrja e Mbrojtjes Olta Xhaçka, ndërsa poston në facebook foto nga puna e efektivëve, konfirmon mbështetjen e Forcave të Armatosura nga toka e ajri, por në rastet kur, sipas ligjit, pushteti vendor ka ezauruar të gjitha kapacitetet e tij.

030

“Flakët e shkaktuara nga dora e njeriut më shumë sesa nga temperaturat e larta, kanë prekur sipërfaqe të tëra me pyja e kullota në 8 qarqe të vendit. Dhjetëra efektivë të Forcave të Armatosura, të pajisur me mjetet e veshjet e posaçme kundër zjarreve, janë angazhuar në disa operacione në Fier, Shkodër, Vlorë, Tiranë, Lezhë etj, ditë e natë, për shuarjen e zjarreve, që famtirësisht nuk kanë cënuar sigurinë e banorëve në këto zona. Angazhimi i FA nga toka e ajri do të jetë i pakursyer në të gjitha rastet kur, sipas ligjit, pushteti vendor ka ezauruar të gjithë kapacitetin me njerëz e mjete”, shprehet në postimin e saj në facebook ministrja e Mbrojtjes.

Ajo shton se: “Ligji 'Për mbrojtjen Civile', të cilin e kemi miratuar një vit më parë e që përbën një prej elementëve më të rëndësishëm të reformës në fushën e Emergjencave Civile, nuk kursen as pushtetin vendor, në rast se nuk i përgjigjet situatave të emergjencës, por as individët, që i vënë zjarrin kullotave e pyjave, duke shkaktuar miliona lek dëm të pasurisë kombëtare”.

080

Ndërkaq, kreu i Agjencisë së Mbrojtjes Civile, Haki Çako, inspektoi situatën e krijuar në malin e Taraboshit në Shkodër. Në një deklaratë për mediat, Çako kërkoi forcim të ligjit për dënimin e autorëve të zjarrvënieve, ndërsa ftoi qytetarët të jenë të kujdesshëm për të mos shkaktuar pasoja të pariparueshme, jo vetëm për ekonominë e përbashkët, por edhe atë individuale.