79 vjet nga Masakra e Borovës, Ministria e Mbrojtjes u jep statusin “Dëshmor i Atdheut“ 107 civilëve të rënë

e enjte, 07 korrik 2022 16:30

Fotogaleria

Në 79 - vjetorin e Masakrës së Borovës, Ministria e Mbrojtjes u akordoi statusin 'Dëshmor i Atdheut', 107 civilëve të rënë.
Në aktivitetin e organizuar në Kolonjë ishte i pranishëm vetë ministri i Mbrojtjes Niko Peleshi, i cili përkujtoi së bashku me familjarët këtë ngjarje tronditëse të historisë së vendit tonë.

Kryetari i Bashkisë së Kolonjës, Erion Isai falënderoi ministrin e Mbrojtjes Niko Peleshi për firmosjen e këtij akti, që ka qenë një përpjekje disavjeçare, ndërsa u shpreh gatishmëria e plotë nga ana e pushtetit lokal dhe atij qendror për ristrukturimin e muzeut.

Më 6 Korrik 1943, formacionet partizane goditën forcat naziste tek Ura e Barmashit. Ushtria gjermane si hakmarrje dogji Borovën, ku brenda një dite u vranë dhe masakruan 107 civilë.

Pas këtij aktiviteti, ministri Peleshi iu përgjigj interesit të medias për situatën e zjarreve në vend.

“Po hyjmë në ditët e nxehta të verës dhe ashtu siç e kemi paralajmëruar fatkeqësisht do të jetë një verë po aq e nxehtë sa vera e vitit të kaluar, në mos më e nxehtë se vitin e kaluar. Ripërsëris apelin në radhë të parë ndaj komuniteteve dhe njësive vendore, pasi ato janë përgjegjëse për të ruajtur dhe administruar territorin e tyre. Ka shumë rëndësi që të sinjalizojnë në kohë, bashkitë, shërbimin zjarrfikës, sepse aty ku bashkitë apo komunitetet vendore, kryepleqtë e fshatrave janë më bashkëpunues nuk kemi zjarre të mëdha sepse sinjalizohen në kohë. Aty ku flenë gjumë, e dini si përfundon historia; kur flakët marrin malin, kërkojnë helikopter. Ju bëj apel të gjithë kryetarëve të bashkive të jenë në krye të detyrës. Nuk ka pushime për ketë vit për kryetarët e bashkive, as për Forcat e Armatosura, as për Ministrinë e Mbrojtjes”, - tha z.Peleshi.

Ministri tha se dy javët e fundit flotës së bashkive u janë shtuar 16 mjete të reja zjarrfikëse, ndërsa së shpejti do të aktivizohet edhe një projekt prej 30 milion Eur, donacion nga Gjermania.