Deklaratë për shtyp e ministrit të Mbrojtjes Niko Peleshi mbi situatën e motit në territorin e vendit

Situata në vend datë 18 janar 2023, ora 13:00

Përshëndetje,

një komunikimin për situatën aktuale të shkaktuar nga reshjet e dy ditëve të fundit të cilat do të vazhdojnë edhe për dy-tre ditët në vijim.

Situata deri tani ka paraqitur probleme nga veriu në jug por jo të përmasave shqetësuese.
Do t’i lexoj jo vetëm për transparencë, por dhe për t’u marrë masat; së pari nga qytetarët, në zonat që janë më të rrezikuara, ose ku ka filluar të shfaqen emergjencat e para; së pari për t’i paraprijë ditëve në vazhdim për shkak të rritjes së intensitetit të reshjeve dhe prurjeve në liqenet dhe hidrocentralet e veriut.

Infrastruktura rrugore:

Në Qarkun Shkodër ka pasur rrëshqitje dherash dhe inerte në disa akse rrugore për të cilat janë duke punuar për pastrimin e tyre pushteti vendor dhe firmat kontraktuese.
Perkatesisht janë shfaqur problematika në:

• Rrugën Prekal - Mali Shoshit - Ndrejaj
• Rrugën Hajmel-Nenshat,
• Rrugën Mnele Vig,

Në aksin rrugor "Qafë Laç - Koman" ka pasur një cedim të trupit të rrugës në krahun e majtë në vendin e quajtur "gjeologjia", në kilometrat e fundit të rrugës (km 21). Kalimi është me një korsi dhe po punohet për vendosjen e sinjalistikës provizore.
Ne segmentin Dedaj - Boge është rritur niveli i përrenjve dhe si pasojë ka prezencë uji në këtë segment. Kalimi po kryhet në rrugë alternative.
Gjithashtu ka problematika në rrugët rurale të të gjithë bashkive.

Furnizimi me energji elektrike:

Ka pasur ndërprerje të energjisë elektrike në disa zona të Qarqeve, për të cilat strukturat e OSSHE janë duke punuar për rikthimin sa më parë të energjisë elektrike.

Kuotat e lumenjve:

• Lumi Osum në Çorovodë, vendi Ura, niveli është + 0.78 m, në pikëmatjen në qytetin Berat, vendi Ura e Varur, niveli është +1.31 m, është në kuota normale dhe nuk paraqet probleme për përmbytje.
• Lumi Devoll është në kuota normale dhe nuk paraqet probleme për përmbytje.
• Niveli i lumit Drin në Shkodër (hidrometri ura e Bohçallëkut) shënon kuotën 6,2 m me një rritje prej 25 cm nga kuota max 7,5 m .
• Niveli i Liqenit ( hidrometri ura e Bunës) shënon 7,55 m nga kuota max 8,7 m.
• Niveli i lumit Drin në Lezhë aktualisht është + 0.73 m, nga +2.0 m që është kuota kritike
• Lumi Vjosa në urën e Përmetit 4.3 m , në urën e Memaliajt është 5 metër, në urën e Mifolit 5 metër me tendencë rritje, deri më tani është në kuota normale dhe nuk paraqet probleme për përmbytje
• Lumi Erzen, Ishëm, Gjole dhe Zezë janë brenda shtratit të tyre dhe nuk paraqesin probleme për përmbytje.
• Lumi Shkumbin dhe Seman janë në kuota normale dhe nuk paraqesin probleme për përmbytje.

Situata nga përmbytjet:

Qarku Shkodër, ka dalje të lumit Buna në Muriqan dhe Oblikë, sipërfaqja e përmbytur është 275 ha.

Ripërsërisim thirrjen: nga bashkitë të merren masat për:

• Paralajmërimin e popullatës veçanërisht në ato zona ku parashikohet që kanë rrezik më të lartë për tu prekur nga fatkeqësia.
• Evakuimin dhe strehimin e përkohshëm të banorëve në rast nevoje.
• Monitorimin e prurjeve nga lumenjtë.
• Kontrollin e vazhdueshëm të gjendjes së argjinaturave të lumenjve, digave të ujëmbledhësve dhe të shkarkuesve katastrofik.
• Kontrollin e funksionalitetit të hidrovorëve, monitorimin e rezervuarëve, kanaleve parësore, dytësore dhe tretësore.
• Mbajtjen në gatishmëri të mjeteve të pushtetit vendor dhe të kontraktorëve të mirëmbajtjes së rrugëve për pastrimin e rrugëve kombëtare dhe rurale.
• Mbajtjen në gatishmëri të kapaciteteve logjistike dhe burimeve njerëzore të forcave operacionale për dhënien e përgjigjes emergjente ( si kërkim shpëtimi, transportimi, kujdesi mjekësor etj)
• Sigurimi dhe rivendosja në funksion e infrastrukturës publike dhe kritike ( uji, rrugët, energjia elektrike, qendrat publike, shkollat etj.)
• Të merren masa nga Bashkitë që kanë porte për ndërprerjen e lundrimit në rast se vlerësohet e nevojshme.
• Policia e Shtetit të marrë masa për rregullimin e qarkullimit rrugor në akset e bllokuara ose me prezencë uji.
• Të sigurohet funksionaliteti i pritave të lumenjve.
• Të sigurohet baza ushqimore për gjënë e gjallë dhe shtetasit.

Më konkretisht i bëjmë thirrje bashkisë Lezhë të ketë në vëmendje:

• Monitorimin e prurjeve të basenit të Lumit Mat dhe Drin që kanë dalje në Ishull Lezhë, Ishull Shëngjin, Gjadër, Kakarriq, Mapë, Fushë Kuqe etj.
• Paralajmërimin e zonave fushore të Zadrimës, në jug të qytetit të Lezhës dhe zonat e ish - kënetës në Mabe, Zojz, Gocaj, Torovicë, Zejmen etj.
• Monitorimin e Hidrovorëve të Toles, Ishull Shëngjin, Balldren, Grykë - Zezë.
• Monitorimin e përrenjve e Trashanit, Fishtës, Grykë Manatisë etj.

Bashkisë Shkodër:

• Të monitorojë prurjet e lumenjve Drin dhe Bunë, Kiri ,Gjadër dhe Liqeni I Shkodrës..
• Te njoftohen zonat si Ana e Malit, Berdice, Bushat, Dajc, Gur I zi, Velipoje etj.
• Të monitorohet rezervuari i Fierzës dhe kaskada e digave të tre rezervuarëve: Fierzë, Koman dhe Vau Dejës.

Bashkisë Fier:

• Të monitorojë basenin e lumit Seman, Vjose, lumin Shkumbin dhe Gjanica.
• Njoftimin e zonave që mund të preken si: njësia administrative Kutë, Hekal, Cakran, Frakull, Levan, Dermenas, Mbrostar, Libofsh, Topojë etj.
• Monitorimin në vazhdimësi të rezervuarëve Kurjan dhe Panahor.

Bashkia Vlorë:

• Monitorimin e basenit të lumit Vjosa, paralajmërimin e popullatës në ato zona ku parashikohet që kanë rrezik më të lartë për tu prekur nga fatkeqësia, veçanërisht në Novoselë, në fshatin Mifol, Ferras, Bishan, Fitore etj
• Monitorimin e rezervuarëve të Babicës, Kallafet, Kanina 1 dhe 2, Petë, Harvala, Hasmat dhe Tërbaç.
• Monitorimin e Hidrovorëve të Akërnisë, qytetit të Vlorës, Goricës dhe Orikumit.

Qarku Gjirokastër:

• Të monitorojnë lumenjtë kryesorë Vjosa dhe Drino, gjithashtu lumin e Suhës, Kserias, Bënçës.
• Monitorimin e përrenjve të Carshovës, Langaricës, Lemnicës, Dishnicës, Zagorisë, Bëncës, Luftinjës etj.
• Të monitorohen digat në rezervuarët: Vriserasë, Dhoksat, Memealiaj, Malas, Këlcyrë, Vinokashit, Strëmbec.

Bashkia Durrës:

• Të monitorojë basenin i Lumit Ishëm dhe Erzen.

Bashkia Elbasan:

• Të monitorojë basenin e Lumit Shkumbin.

Për menaxhimin e çdo lloj situate që mund të vijë si pasojë e përmbytjeve janë në gatishmëri në nivel kombëtar:

• Forcat e Armatosura: 1200 forca dhe 450 mjete
• Shërbimi zjarrfikës: 1203 forca dhe 159 mjete
• Shërbimi mjekësor: 113 autoambulanca me personel
• Policia Shtetit: 200 forca në gatishmëri
• Struktura vullnetare: 150 persona
• Mjete transporti të ndryshme: 176
• Mjete ajrore: 3 helikopterë ( FA, UM, PSH).

Thirrje qytetarëve:

I bëjmë thirrje qytetarëve në zonat e rrezikuara të bëjnë kujdes me lëvizjet e tyre në orët në vijim, të shmangin kalimet në rrugët me prezencë uji, të respektojnë rregullat e qarkullimit rrugor dhe të njoftojë strukturat vendore në çdo rast nevoje.

Fakti që kam dalë dy ditë në konferencë për shtyp nuk duhet të përkthehet në alarm dhe panik. Asgjë nuk ka për t’u merakosur në kuptimin e ndonjë fatkeqësie të pritshme, por gjithsesi, në tani jemi mësuar, jemi një vend i rrezikuar pothuajse në të gjitha stinët e vitit nga fatkeqësi natyrore dhe emergjenca civile. Nëse marrim masat në kohë për të shmangur më të keqen, atëherë arrijmë t’ia dalim siç kemi bërë dhe deri më tani, me aspak ose fare pak me humbje materiale, apo humbje njerëzish. Edhe një jetë njeriu është shumë e çmuar ndaj ia vlen të bëjmë gjithë përpjekjet, të mobilizojmë të gjithë sistemin tonë të emergjencave civile për të dalë pa dëme të konsiderueshme nga kjo situatë emergjente e këtyre ditëve të kaluara dhe të ditëve në vijim,

faleminderit!