Situata e zjarreve në vend

e diel, 27 gusht 2023 18:53

Fotogaleria

Pas shumë orësh në "luftë" me zjarret, falë punës së efektivëve të Forcave të Armatosura, punonjës të Shërbimit Zjarrfikës dhe Emergjencave Civile pranë pushtetit vendor, 15 vatra zjarri janë shuar në zona të ndryshme të territorit të vendit, gjatë 24 orëve të fundit.

Po punohet me intensitet në vetëm 2 vatra aktive për neutralizimin e tyre.

Në fshatin Krastë, njësia administrative Fushë-Krujë, puna vazhdon për zjarrin e rënë në një sipërfaqe me pisha ku situata është nën kontroll.

Forcat e Armatosura iu përgjigjën menjëherë kërkesës së autoriteteve vendore të Elbasanit për të ndihmuar më vënien në kontroll të flakëve në vendgrumbullimin e mbetjeve urbane. 20 efektivë të BMEC-së dhe 5 mjete janë nisur krah forcave zjarrfikëse të Elbasanit për të frenuar përhapjen e zjarrit që favorizohet nga era dhe temperaturat e larta.

Gjatë gjithë natës dhe pa ndërprerje punohet në vendgrumbullimin e mbeturinave të qytetit Elbasan, për kapsulimin e vatrave pas zjarrit me përmasa të mëdha, pasditen e djeshme.

71 forca të Emergjencave Civile dhe efektivë të Forcave të Armatosura nën koordinimin e Agjencisë Kombëtare të Mbrojtjes Civile kanë bërë të mundur izolimin e vatrave të zjarrit.

16 mjete zjarrfikëse dhe 10 mjete ndihmëse i janë bashkuar këtij operacioni duke përmirësuar situatën e vështirë të krijuar nga temperaturat e larta që krijohen nga djegia e mbeturinave.

Të gjitha kapacitetet në nivel vendor dhe qendror janë në gatishmëri të plotë për mbajtjen nën kontroll të situatës.