Në mjediset e auditorit “Gjeneral Enrico Tellini” pranë Ministrisë së Mbrojtjes, u organizua ditën e sotme ceremonia e certifikimit të pjesëmarrësve të Kursit të 14 të të Lartë për Sigurinë dhe Mbrojtjen.
Në këtë aktivitet morën pjesë, shefi i Shtabit të Përgjithshëm të FA gjeneralmajor Arben Kingji, sekretarja e Përgjithshme në MM, znj. Gelardina Prodani, zëvendësshefja e Shtabit të Përgjithshëm të FA gjeneralmajor Manushaqe Shehu, ambasadorë dhe atashe ushtarakë rezident në vendin tonë, anëtarë të Komisionit të Sigurisë Kombëtare, komandantë forcash kryesore dhe të njësive autonome, familjarë, drejtorë dhe përfaqësues të lartë nga Ministria e Mbrojtjes dhe Shtabi i Përgjithshëm i FA.
Në përshëndetjen e tij të veçantë në këtë ceremoni, shefi i Shtabit të Përgjithshëm të FA gjeneralmajor Arben Kingji, pasi uroi pjesëmarrësit e kursit për përfundimin me sukses të Kursit të 14-të të Lartë për Sigurinë dhe Mbrojtjen, vlerësoi kontributin e Kolegjit të Mbrojtjes dhe Sigurisë për drejtimin dhe zhvillimin e kursit më të lartë në piramidën e arsimimit ushtarak për çështjet e Sigurisë dhe Mbrojtjes: “Në emër të ministrit të Mbrojtjes, z. Peleshi dhe në emrin tim personal, ju përgëzoj për këtë moment historik të rëndësishëm të rrugë timit tuaj profesional. Sot shënon fundi i një periudhe tre mujore kushtuar avancimit të njohurive tuaja në një gamë të gjerë temash të orientuara drejt sigurisë dhe mbrojtjes, politikave dhe marrë dhënieve ndërkombëtare koncepteve bashkë kohore të sigurisë dhe mbrojtjes ...”
Më tej gjatë përshëndetjes së tij gjeneralmajor Kingji u ndal në rëndësinë e veçantë që ka ky kurs, duke pasur parasysh dinamikën dhe kompleksitetin e peizazhit aktual të sigurisë globale: “Mjedisi i sigurisë dhe rendi ndërkombëtar (i lindur nga Lufta e Dytë Botërore), janë nën stres dhe vazhdimisht vuajnë pasojat e konkurrencës strategjike dhe konflikteve të armatosura. Lufta e vazhdueshme në Ukrainë, konfliktet në Lindjen e Mesme dhe krizat e tjera kanë vendosur kushtet për Rusinë dhe Kinën që të rrisin ndikimin e tyre dashakeqe në Ballkanin Perëndimor dhe nëpërmjet përfaqësuesve të tyre po nxisin tensionet etnike dhe po pengojnë përparimin dhe integrimit euroatlantik. Në këtë drejtim, si masë zbutëse bëhet e domosdoshme për ne, të kuptojmë mjedisin e sigurisë, të nxisim bashkëpunimin dypalësh dhe rajonal, të promovojmë stabilitetin dhe të ndajmë ekspertizën në çështjet e mbrojtjes dhe sigurisë …”, - u shpreh ndër të tjera gjeneralmajor Kingji.
Në përfundim të përshëndetjes së tij SHSHPFA gjeneralmajor Arben Kingji shprehu mirë njohjen për organizatorët e kursit, komandantin dhe stafin e Kolegjit të Lartë të Mbrojtjes dhe Sigurisë, për përkushtimin e tyre dhe për vendosjen e kushteve për zhvillimin e suksesshëm të kursit.
Nga ana e tij komandanti i Kolegjit të Mbrojtjes dhe Sigurisë gjeneral brigade Ylli Pulaj falënderoi institucionet e larta të vendit dhe Forcat e Armatosura të vendeve të NATO dhe me gjerë për pjesëmarrësit e dërguar, duke e vlerësuar, për studimet e tyre, institucionin e Kolegjit të Mbrojtjes dhe Sigurisë ndër të tjerë. Më pas ai u ndal në trajtimin e çështjeve kryesore gjatë kursit ku kombinimi i duhur i përfaqësuesve bëri që jo vetëm të diskutoheshin tema aktuale të mjedisit të përbashkët të mbrojtjes dhe sigurisë por dhe të shkëmbeheshin opinione dhe mendime duke krijuar një network të qëndrueshëm në kohezion me situatën aktuale të sigurisë. Një falënderim të veçantë adresoi për pjesëmarrësit nga Bullgaria, Gjeorgjia, Gjermania, Italia, Kosova, Rumania, Greqia dhe Turqia, të cilët sollën frymën e bashkëpunimit të ndërsjelltë me punën dhe përfaqësimin e tyre përgjatë tre muajve. Në përfundim, falënderoi Ministrinë e Mbrojtjes dhe Shtabin e Përgjithshëm të FA për mbështetjen e dhënë në vijimësi për realizimin me sukses të kursit.
Më tej, ceremonia ka vijuar me një përshëndetje në emër të kursit. Kolonel Silviu-Vasile Maricas, i cili pasi falënderoi Kolegjin e Mbrojtjes dhe Sigurisë dhe nëpërmjet tij edhe shtetin shqiptar për mikpritjen, mbështetjen dhe qasjen mjaft pozitive ndaj të gjithë anëtarëve të kursit, që tashmë do jetë një eksperience e paharruar profesionale dhe kulturore, u shpreh ndër të tjera: “Kurrikula e pasur me tema aktuale nga mjedisi rajonal dhe botëror, pjesëmarrja e përfaqësuesve të lartë nga institucione prestigjioze dhe me emër, por dhe ekspertëve të çështjeve civile dhe ushtarake nga Shqipëria, SHBA dhe Evropa e bënë këtë kurs tërheqës dhe frutdhënës duke kontribuar në zhvillimin profesional dhe arritjen e objektivave të trajnimit. Udhëtimet studimore brenda dhe jashtë vendit na lejuan të njohim nga afër infrastrukturën dhe organizimin e mekanizmave të sigurisë por dhe të njohim më shumë qasjen e lidershipit politik dhe ushtarak në çështje të ndryshme. Përvojat e ndryshme akademike dhe profesionale sfiduan aftësitë tona të komunikimit dhe punës në grup, duke nxitur mirëkuptimin e përbashkët. Gjatë tre muajve ne kuptuam se ndajmë interesa dhe shqetësime të përbashkëta për sigurinë në rajon dhe më gjerë. Faleminderit nga Ju!”
Në këtë kurs morën pjesë 15 përfaqësues nga Forcat e Armatosura shqiptare, institucionet e sigurisë në vend si dhe përfaqësues të ushtrive të vendeve të NATO-s dhe partnere.
Aktiviteti u mbyll me shpërndarjen e certifikatave dhe me fotografi të përbashkët.
