Vendimi për pagat, Peleshi: Rritje domethënëse për të gjitha gradat, nga ushtari I te gjenerali, përfitojnë edhe zjarrfikësit

e mërkurë, 26 qershor 2024 15:25

Ministri i Mbrojtjes Niko Peleshi njoftoi rritjen e re të pagave për Forcat e Armatosura dhe personelin civil të administratës publike. Në deklaratën e bërë pas mbledhjes së qeverisë, ministri Peleshi tha se kjo është një rritje domethënëse që prek të gjitha nivelet, nga ushtari I e deri te gjeneralët, ndërsa theksoi se pagat e ushtarakëve do të rriten çdo vit, deri sa të arrijnë nivelin e pagave të vendeve të Aleancës.

"Kjo rritje filloi në vitin 2022, me rritjen më të madhe të historisë të pas viteve ’90 në Shqipëri, me 30% dhe është një premtim dhe angazhim i kryeministrit që pagat e Forcave të Armatosura do të rriten çdo vit deri sa ne të arrijmë nivelin mesatar të vendeve të Aleancës, ku bëjmë pjesë. Pagat e Forcave të Armatosura do të rriten çdo vit! Jemi shumë afër, duke kaluar vendet e rajonit, duke shkuar drejt vendeve dinjitoze", - u shpreh Ministri i Mbrojtjes.

Në deklaratën e tij ai specifikoi edhe nivelin e rritjes që nis nga 1 korriku. "Për ushtarin IV, paga bazë do të shkojë në 71.000 Lek sipas gradës dhe viteve të shërbimit, nga 42.000 Lek në vitin 2019 pra një rritje në këto vite prej 29.000 lekësh. Të gjitha pagat që do të lexoj, iu shtohet dhe trajtimi me ushqim që jepet në formën e kompensimit ushqimor prej 16.000 lekësh.
Pra një ushtar VI nuk do të marrë 71.000 Lek, por do të marrë 87.000 Lek. Këtë duhet të dëgjojnë të gjithë të rinjtë, pasi kushdo që do të bëhet pjesë e Forcave të Armatosura e nis me një pagesë 87.000 Lek. Politika e këtij viti, e këtij vendimi është nga 7 deri në 22%, ku në ndryshim nga dy vitet e fundit, këtë vit do i japim më shumë prioritet gradave më të ulëta.
Rreshteri në vitin 2019 e ka patur pagën 48.200 Lek, me rritjen prej 30% shkoi në 62.660 Lek dhe me rritjen e sotme shkon në 80.000 Lek, duke shtuar plus 16.000 Lek të trajtimit ushqimor", - sqaroi ministri Peleshi.

Z. Peleshi tha më tej se: "Majorit, nga 68.800 Lek, paga i shkoi në 89.440 Lek pas rritjes me 30% dhe sot shkon në 107.000 Lek pa trajtimin ushqimor. Diferenca në pesë vite është 38.200 Lek.
Koloneli në 2019 paguhej 110.000 Lek, shkoi në 143.000 Lek pas rritjes me 30% dhe sot shkon në 163.500 lek pa trajtimin ushqimor. Gjenerali e ka patur pagën 127.500 në vitin 2022 , shkoi në 165.000 pas rritjes me 30% dhe sot shkon në 190.000 Lek. Pra një rritje prej 62.500 lekësh", - theksoi ministri Peleshi.

Gjatë fjalës së tij, ministri Peleshi theksoi se qeveria ka rritur buxhetin e Ministrisë së Mbrojtjes në 2% të GDP duke e bërë Shqipërinë një nga 22 vendet aleate në NATO që përmbushin angazhimin e Aleancës. Dhe sipas z. Peleshi, në buxhetin e pagave lëvizen 11 milion dollarë, duke patur parasysh që edhe personeli civil do të ketë rritjen e pagave.

Ministri i Mbrojtjes bëri të ditur se rritje pagash do të ketë edhe personeli zjarrfikës, i cili sipas tij bën një punë shumë të rëndësishme, të pazëvendësueshme dhe të çmuar. Kjo rritje, sipas tij shkon deri në 30% në varësi të gradave: "Asistent zjarri, që është grada më e ulët e zjarrfikësit, paga aktuale është 46.000 Lek, rritet në përqindje 30.43%, në vlerë 14.000 Lek, paga sot shkon në 60.000 Lek. Sapo hyn në Shërbimin Zjarrfikës, paga fillestare nga sot do të jetë 60.000 Lek. Zjarrfikësi, një gradë më e lartë, ka pasur pagën 52.500 Lek, sot shkon në 65,000 Lek; kryezjarrfikës nga 55.000 Lek shkon në 70,000 Lek; kryeinspektor zjarrfikës nga 74.500 Lek shkon në 85.000 Lek; inspektor zjarrfikës nga 64.200 Lek shkon në 75.000 Lekë; komisar zjarrfikës nga 97.500 Lek shkon në 105.000 Lek; drejtues zjarrfikës nga 108.000 Lek shkon në 115.000 Lek; drejtues i parë zjarrfikës nga 120.000 Lek në 140.000 Lek dhe drejtues i lartë zjarrfikës nga 131.000 Lek shkon në 160.000 Lek", - specifikoi ministri Peleshi, duke i cilësuar si nivele shumë dinjitoze pagash.

Ministri Peleshi pati edhe një thirrje për drejtuesit vendorë, në një kohë që temperaturat janë rritur dhe rrezikshmëria për rënien e zjarreve është më e lartë: "Jemi për fat të keq në prag të sezonit të zjarreve, vera e nxehtë sjellë dhe qindra vatra zjarresh. Ju bëj thirrje kryetarëve të bashkive, natyrisht edhe një apel të gjithë forcës tonë zjarrfikëse, të qëndrojnë në krye të detyrës për eliminimin e pasojave, në një stinë që fatkeqësisht pritet të jetë më e nxehtë se vitet e tjera", - u shpreh z. Peleshi.