Angazhimi në shuarjen e zjarreve, ministri Vengu falënderon efektivët e Regjimentit të Këmbësorisë së Jugut në Poshnje

e enjte, 08 gusht 2024 10:15

Fotogaleria

Regjimenti i Këmbësorisë së Jugut, pjesë e Forcës Tokësore të Forcave të Armatosura, është një nga strukturat që ka një kontribut të rëndësishëm në operacionet e emergjencave civile gjatë këtij viti.

Vetëm gjatë muajit të fundit 1057 efektivë dhe 85 mjete kanë marrë pjesë në 35 operacione për shuarjen e zjarreve në rajonet e Llogarasë, Vlorës, Pashalimanit, Himarës, Delvinës, Dropullit, Gjirokastrës, Sarandës, Tepelenës, Beratit, Maliqit, Korçës dhe i fundit i kryer dje, në Konispol.

Ministri i Mbrojtjes Pirro Vengu ishte në Poshnje, ku u takua me efektivë të këtij regjimenti, të cilët i falënderoi për punën e palodhur në ndihmë të komunitetit. Gjatë vizitës ministri i Mbrojtjes theksoi vijimin e përpjekjeve për modernizimin e mëtejshëm të Forcave të Armatosura, si një element tejet i rëndësishëm, jo vetëm për përmbushjen e zotimeve në kuadër të sigurisë kolektive të NATO-s, por edhe në funksion të misioneve dhe përparësive kombëtare të Forcave të Armatosura.

Gjatë kësaj vizite në Poshnje, ministri i Mbrojtjes drekoi me efektivët e Regjimentit të Këmbësorisë së Jugut, të cilët ndanë edhe momente nga përditshmëria e tyre.