Fuqizimi dhe modernizimi i FA, ministri Vengu takime me përfaqësues diplomatikë të SHBA-së, Mbretërisë së Bashkuar, Italisë, Turqisë dhe Ukrainës

e premte, 09 gusht 2024 12:05

Fotogaleria

Fuqizimi operacional i Forcave të Armatosura të Shqipërisë, përmes modernizimit të mjeteve, pajisjeve, armatimeve dhe sistemeve, ishte në fokus të takimeve të veçanta këtë javë të ministrit të Mbrojtjes Pirro Vengu me atasheun ushtarak të Shteteve të Bashkuara dhe ambasadorët e Mbretërisë së Bashkuar, Italisë, Turqisë dhe Ukrainës.

Gjatë këtyre takimeve, ministri Vengu rikonfirmoi qëndrimin e qeverisë shqiptare për mbështetjen e Aleancës në përballimin e rreziqeve në kufijtë lindorë dhe jugorë të NATO. Po ashtu, u theksua solidariteti i gjithanshëm dhe efektiv i Shqipërisë me Ukrainën në përballimin e agresionit që po përjeton vendi.

Ky bashkëpunim dhe angazhim i vazhdueshëm synon jo vetëm përmirësimin e kapaciteteve të mbrojtjes kombëtare, por edhe forcimin e sigurisë kolektive brenda Aleancës dhe përtej saj.