Zjarret, mbërrijnë në Shqipëri dy avionë rumunë, ndërhyrja e parë në Malin e Thatë

e mërkurë, 14 gusht 2024 14:30

Fotogaleria

Dy avionë të Forcave të Armatosura të Rumanisë mbërritën sot në Shqipëri duke iu bashkuar përpjekjeve të forcave shqiptare për izolimin dhe shuarjen e vatrave të zjarrit në disa zona problematike të vendit.

Avionët vijnë në vendin tonë, si mbështetje e Mekanizmit Evropian të Mbrojtjes Civile, pjesë e të cilit është edhe Shqipëria.

Ekuipazhet rumune do të dislokohen për rreth një javë në Bazën Ajrore të Kuçovës, ku do të koordinohen nga Agjencia Kombëtare e Mbrojtjes Civile për t'u angazhuar në vatrat ku ka më shumë nevojë. Për shkak të problematikës së krijuar vatra e parë ku po ndërhyhet me avionët rumunë është ajo e Malit të Thatë në Pustec, ku prej disa ditësh zjarri vazhdon të jetë aktiv për shkak të terrenit të vështirë dhe bimësisë lehtësisht e djegshme. Në mbështetje të forcave në terren janë edhe 107 trupa ushtarake dhe 10 mjete.

I pranishëm në pritjen e dy avionëve nga Rumania me ekuipazhet e tyre, ministri i Mbrojtjes Pirro Vengu falënderoi autoritetet rumune për ndihmën në këto momente të vështira.

Dy avionët ushtarakë janë njëri model C-27J (Spartan), që do të angazhohet në operacionet e fikjes së zjarreve dhe, tjetri, C-130 (Hercules), i cili ofron mbështetje logjistike për C-27J, ndërsa kapaciteti është 6 ton ujë për çdo fluturim.