Ministri Vengu takim me të ngarkuarën me punë të SHBA në Tiranë Nancy VanHorn: Të angazhuar për forcimin e bashkëpunimit

e mërkurë, 14 gusht 2024 10:01

Fotogaleria

Ministri Mbrojtjes Pirro Vengu priti në një takim mirëseardhjeje të ngarkuarën me punë të SHBA në Tiranë, Nancy VanHorn, të cilës i uroi mirëseardhjen në Shqipëri.

Duke nënvizuar lidhjen e fortë strategjike të vendit tonë me SHBA dhe rolin e pazëvendësueshëm që ato kanë në proceset transformuese në Shqipëri, ministri Vengu shprehu angazhimin për të thelluar bashkëpunimin në fushën strategjike të Sigurisë dhe Mbrojtjes.

Gjatë bisedës, ministri u ndal në prioritetet kyçe të Ministrisë së Mbrojtjes si: transformimi dhe modernizimi i FARSH, projektet me impakt strategjik të shumëfishtë për vendin, siç është porti ushtarak i Porto Romanos, rijetëzimi i industrisë ushtarake në vend, apo edhe angazhimet e detyrimet politike, institucionale dhe ushtarake në NATO.

Ministri Vengu dhe e ngarkuara me punë e SHBA, VanHorn vlerësuan nivelin e lartë të bashkëpunimit sa i përket modernizimit dhe kapaciteteve, për ta çuar atë në nivele më të larta, nëpërmjet projekteve madhore.

Nga ana e saj, znj. VanHorn falënderoi ministrin për pritjen dhe shprehu mirënjohjen për rolin kyç që luan Shqipëria si aleat luajal i SHBA në arenën ndërkombëtare, duke e siguruar ministrin e Mbrojtjes për mbështetje të vazhdueshme nga ana e të gjithë stafit të ambasadës, personelit ushtarak dhe civil amerikan të mbrojtjes, që është prezent në vendin tonë.

Në fund të takimit ministri Vengu dhe e ngarkuara me punë e SHBA VanHorn nënshkruan Memorandumin e Bashkëpunimit për vendosjen e Këshilltarit të Planifikimit Strategjik të Mbrojtjes pranë Ministrisë së Mbrojtjes, z. Randy Hinton.

Z. Hinton do t'i bashkohet kështu katër këshiltarëve të tjerë amerikanë që ndërveprojnë në baza ditore me stafin civil dhe ushtarak shqiptar, në fushën e burimeve logjistike, personel - rekrutimit si dhe sigurisë kibernetike.