Përfundoi detyrën si Komandant i KFOR, ministri Vengu pret gjeneralmajor Özkan Ulutaş

e hënë, 30 shtator 2024 19:26

Ministri i Mbrojtjes, z. Pirro Vengu priti në një takim të veçantë gjeneralmajor Özkan Ulutaş në përfundim të detyrës si Komandant i KFOR.
Ministri Vengu e falënderoi gjeneralmajor Ulutaş për punën e mirë që ka bërë si komandant i KFOR-it, duke i uruar njëherësh edhe suksese në detyrën e re, që pritet të marrë në Turqi.

Ministri i Mbrojtjes dhe komandanti i KFOR diskutuan rreth situatës së krijuar në veri të Kosovës. Ministri Vengu e informoi komandantin e KFOR se në takimet që pati me drejtues të institucioneve të Kosovës, theksoi se, duhen bashkërenduar veprimet me aleatët dhe me KFOR.

Komandanti i KFOR u shpreh se situata në terren nuk është edhe aq e qetë. Ndaj të dy bashkëbiseduesit ranë dakord që përmirësimi i raporteve mes palëve do të sillte edhe një përmirësim të situatës në terren. Megjithatë, ministri i Mbrojtjes theksoi se është e rëndësishme që Policia e Kosovës të vazhdojë të konsiderohet si forca e parë reaguese dhe të qëndrojë si e tillë.

Gjatë bisedës ministri i Mbrojtjes z. Pirro Vengu dhe komandanti i KFOR biseduan edhe për përpjekjet e Shqipërisë për rigjallërimin e Industrisë Ushtarake.