Ministri Vengu pret drejtorin e Qendrës për Siguri e Bashkëpunim: Shqipëria, e angazhuar për çdo nismë që kontribuon për paqen e sigurinë në rajon

e enjte, 03 tetor 2024 13:32

Ministri i Mbrojtjes z. Pirro Vengu priti në një takim të veçantë drejtorin e Qendrës për Siguri e Bashkëpunim RACVIAC, me qendër në Zagreb, Kroaci, ambasador Constantin-Mihail Grigorie
Ministri i Mbrojtjes falënderoi ambasador Grigorie për drejtimin e kësaj qendre, e cila mbetet një nismë e rëndësishme në Evropën Juglindore, që kontribuon në rritjen e besimit, stabilitetit dhe bashkëpunimin për sigurinë dhe paqen në rajon.

Ministri Vengu theksoi se vendi ynë ka përmbushur me sukses detyrimet e saj në këtë qendër dhe do të vijojë angazhimet edhe në të ardhmen. Qeveria shqiptare ka mbështetur dhe vazhdon të mbështesë çdo projekt të iniciuar nga RACVIAC me qëllim rritjen e bashkëpunimit, rritjen e dialogut ndërmjet vendeve për krijimin e një mjedisi të sigurt në rajon.

Ministri i Mbrojtjes dhe drejtori i RACVIAC diskutuan mbi perspektivat e RACVIAC në të ardhmen dhe mbështetjen që duhet të japin vendet anëtare për integrimin euroatlantik të tyre.
Në këtë takim u diskutua mbi projektet aktuale që Qendra RACVIAC zhvillon bazuar në programin vjetor, si Projekti për Mospërhapjen e Armëve të Dëmtimit në Masë, zhvillimet e fundit mbi Inteligjencën Artificiale, përfshi këtu aktivitetin që aktualisht po zhvillohet në Tiranë mbi kërcënimet kibernetike dhe hibride dhe sfidat në Evropën Juglindore.

Drejtori i RACVIAC falënderoi vendin tonë për mbështetjen e dhënë nga Shqipëria në këtë organizatë rajonale me personel, kontribut financiar dhe angazhimet e ndryshme që ka patur.

Gjatë bisedës ministri i Mbrojtjes dhe ambasadori Grigorie diskutuan edhe mbi mundësinë e anëtarësimit të Kosovës në këtë organizatë.