Mbahet në Tiranë takimi për forcimin e Sigurisë Kibernetike, zëvendësministri Tola: Shqipëria, e palëkundur për stabilitetin në rajon

e enjte, 03 tetor 2024 11:53

Në kuadër të angazhimeve të Shqipërisë si vend anëtar në Qendrën për Bashkëpunim për Siguri “RACVIAC”, me qendër në Zagreb, Kroaci, u zhvillua në Tiranë aktiviteti me temë: “Forcimi i qëndrueshmërisë në sigurinë kibernetike dhe ndaj kërcënimeve hibride në Evropën Juglindore”. Ky aktivitet u organizua nga Qendra rajonale për Bashkëpunim për Siguri “RACVIAC” në bashkëpunim me akademinë ushtarake “Mihailo Apostolski” të Republikës së Maqedonisë së Veriut dhe Ministrinë e Mbrojtjes të Republikës së Shqipërisë.

Qëllimi i këtij aktiviteti ishte shkëmbimi i eksperiencave kombëtare dhe rajonale mbi kërcënimet kibernetike dhe hibride, në rajonin e Evropës Juglindore dhe sfidat në përballimin e tyre.
Në emër të ministrit të Mbrojtjes dhe të qeverisë shqiptare zëvendësministri i Mbrojtjes z. Dorian Tola vlerësoi punën e qendrës RACVIAC ndër vite, e cila nëpërmjet zhvillimit të aktiviteteve të shumta ka bërë të mundur rritjen dhe forcimin e bashkëpunimit ndërmjet vendeve në rajonin, duke sjellë stabilitet dhe siguri më të madhe në Evropën Juglindore. Zëvendësministri Tola konfirmoi angazhimin e Shqipërisë për sigurinë rajonale, duke theksuar pjesëmarrjen aktive të vendit tonë në nismat me NATO, BE, OSBE.

Shqipëria do të vazhdojë të jetë vigjilente ndaj kërcënimeve kibernetike dhe hibride dhe do bëjë përpjekjet maksimale në përballimin e sfidave ndaj kërcënimeve duke bashkëpunuar ngushtë me aleatët dhe partnerët për të garantuar sigurinë në infrastrukturën kombëtare.

Zëvendësministri i Mbrojtjes theksoi se: “Shqipëria mbetet e palëkundur në përkushtimin e saj ndaj sigurisë dhe stabilitetit të Ballkanit Perëndimor. Ne do të vazhdojmë të udhëheqim dhe të kontribuojmë në nismat që forcojnë qëndrueshmërinë tonë kibernetike, forcojnë mbrojtjen tonë kombëtare dhe na përgatitin për të ardhmen. Së bashku, përmes vendosmërisë së përbashkët, bashkëpunimit dhe inovacionit, ne do të mund të sigurojmë që rajoni ynë të mbetet i sigurt përballë këtyre kërcënimeve në zhvillim”, u shpreh zëvendësministri i Mbrojtjes.

Ai shtoi se ky aktivitet do të japë njohuri të vlefshme, strategji vepruese dhe partneritet të qëndrueshëm për fuqizimin e vendeve të rajonit për të përballuar sfidat e së sotmes dhe së nesërmes.