80-Vjetori i Çlirimit të Vlorës, ministri Vengu nderon dëshmorët e rënë

e martë, 15 tetor 2024 13:07

Në 80-Vjetorin e Çlirimit të Vlorës, ministri i Mbrojtjes z. Pirro Vengu shoqëruar nga kryetari i Bashkisë së Vlorës z. Ermal Dredha zhvilluan homazhe në nderim të dëshmorëve të rënë për lirinë e qytetit, por edhe të të gjithë vendit.

Ministri Vengu vendosi një kurorë me lule në Varrezat e Dëshmorëve të qytetit, në kujtim të të gjithë atyre luftëtarëve që sakrifikuan jetën për lirinë dhe pavarësinë e vendit.
“Lufta e shqiptarëve për liri kulmoi me çlirimin e vendit tetë dekada më parë në disa nga qytetet më të mëdha të vendit dhe një prej tyre ishte edhe Vlora. Në këtë 80-Vjetor të Çlirimit të Vlorës, kujtojmë me krenari dhe mirënjohje të thellë ata që luftuan dhe dhanë jetën për të mbrojtur atdheun. Nder dhe përgjegjësi e madhe të kujtojmë dëshmorët, sakrifica e të cilëve është themeli i të ardhmes sonë dhe një kujtesë e fortë e detyrimit për ta ruajtur këtë trashëgimi me nder”, - u shpreh ministri i Mbrojtjes.