Shqipëria merr pjesë në stërvitjen ndërkombëtare kibernetike “Cyber Yankee 2025”
Njësia Ushtarake e Sigurisë Kibernetike (NJUSK) nga Shqipëria ka marrë pjesë me sukses në stërvitjen e përvitshme ndërkombëtare "Cyber Yankee 2025", e cila u zhvillua në Qendrën e Trajnimit Edward Cross në New Hampshire, SHBA, nga 5 - 16 maj 2025. Kjo stërvitje u organizua nga Gardat Kombëtare të shteteve të New England dhe New Jersey në kuadër të Programit të Partneritetit Shtetëror.
"Cyber Yankee" është një ndër stërvitjet më të rëndësishme në nivel taktik për operacionet e mbrojtjes kibernetike në SHBA. Ajo synon testimin e aftësive të reagimit ndaj incidenteve që prekin infrastrukturën kritike – përfshirë energjinë, gazin dhe furnizimin me ujë – përmes një bashkëpunimi të ngushtë ndërmjet forcave të armatosura, agjencive qeveritare, sektorit privat dhe partnerëve ndërkombëtarë.
Në edicionin e njëmbëdhjetë të stërvitjes morën pjesë mbi 300 pjesëmarrës, përfshirë anëtarë të gardave kombëtare të ushtrisë, forcave ajrore, marinës dhe forcave hapësinore të SHBA. Po ashtu, pjesëmarrës ishin edhe ekspertë nga Komanda Kibernetike e SHBA-së, Agjencia për Sigurinë Kibernetike dhe Infrastrukturën (CISA), Departamenti i Energjisë dhe agjenci të tjera federale dhe shtetërore.
Shqipëria ishte një nga gjashtë partnerët ndërkombëtarë të ftuar në stërvitje, së bashku me Bahamas, El Salvador, Izraelin, Kenian dhe Paraguajin. Ekipi shqiptar demonstroi profesionalizëm të lartë në reagimin ndaj incidenteve, analizën e kërcënimeve dhe zbatimin e operacioneve mbrojtëse në mjedisin digjital.
Gjatë zhvillimit të kesaj stërvitje, anëtarët e ekipit Shqiptar morën gjithashtu pjesë në garat “Capture the Flag” (CTF), të organizuara nga Instituti Ndërkombëtar SANS. Këto gara janë sfida të avancuara në fushën e sigurisë kibernetike, ku pjesëmarrësit testojnë aftësitë e tyre në identifikimin dhe shfrytëzimin e cenueshmërive në sisteme të simuluara. Në një konkurrencë me mbi 300 pjesëmarrës, pjesëtarët e ekipit shqiptar arritën një sukses të jashtëzakonshëm duke zënë 4 vendet e para, duke dëshmuar jo vetëm nivelin e tyre të lartë teknik, por edhe përgatitjen dhe profesionalizmin e Njësisë Ushtarake të Sigurisë Kibernetike.
Kjo pjesëmarrje përfaqëson një moment të rëndësishëm për forcimin e kapaciteteve kombëtare të sigurisë kibernetike dhe shkëmbimin e përvojave me partnerë ndërkombëtarë. Duke marrë parasysh rritjen e kërcënimeve në fushën digjitale, bashkëpunime të tilla janë thelbësore për të ndërtuar një qasje të koordinuar dhe efektive ndaj sfidave të reja globale në sigurinë kibernetike.
Artikuj nga Newsroom
e hënë, 19 Maj 2025
