Efektivët e Forcave Tokësore trajnohen për herë të parë me sistemin raketor kundërtank “Javelin”

e mërkurë, 04 shkurt 2026 14:55

Në Shkollën e Trupës së Forcës Tokësore po zhvillohet për herë të parë një kurs trajnimi për përdorimin e sistemit raketor kundërtank “Javelin”, një nga sistemet më të avancuara të mbrojtjes që përdoret nga vendet anëtare të NATO-s, tashmë pjesë e inventarit të Forcave të Armatosura Shqiptare.

Nënkolonel Jorid Aliaj, komandant i Shkollës së Trupës në Forcat Tokësore, theksoi se qëllimi i këtij trajnimi është përgatitja sa më efektive dhe profesionale e efektivëve për përdorimin e armëve të gjeneratës së fundit.

“Në Shkollën e Trupës së Forcës Tokësore, ku për herë të parë po zhvillojmë një kurs trajnimi me personelin e Batalionit të Këmbësorisë së Lehtë, të cilët po aplikojnë në përdorimin e sistemit kundërtank ‘Javelin’. Ky sistem ka ardhur së fundmi në Forcën Tokësore dhe personeli po trajnohet në procedurat e përdorimit, targetimit dhe në aplikimin e skenarëve realë nën asistencën e instruktorëve tanë,” u shpreh nënkolonel Aliaj.

Përdorimi i këtij sistemi rrit ndjeshëm aftësinë e operatorëve për të marrë vendime të sakta dhe në kohë reale, duke përmirësuar efikasitetin operacional.

“Trajnerët e Shkollës së Trupës janë këtu për të asistuar në kuptimin e të dhënave taktiko-teknike të sistemit, me qëllim që operatorët të jenë sa më të familjarizuar dhe ta përdorin armën në mënyrë sa më efikase,” shtoi ai.

Komandanti i Shkollës së Trupës në Forcën Tokësore, theksoi se ky trajnim nuk zëvendëson stërvitjen në terren, por e plotëson atë.

“Këtu replikohen situata të ndryshme që hasen në operacione reale, në të gjitha llojet e terreneve, përfshirë edhe angazhimin ndaj objektivave ajrore që fluturojnë në lartësi të ulëta. Objektivi ynë është të kemi një trupë maksimalisht të përgatitur profesionalisht dhe të rrisim aftësinë goditëse të Forcave tona,” theksoi nënkolonel Aliaj.

Sistemi raketor kundërtank “Javelin”,konsiderohet një element kyç për mbrojtjen tokësore, duke rritur ndjeshëm aftësinë e Forcës Tokësore për të përballuar kërcënime të avancuara dhe për të vepruar në përputhje me standardet e Aleancës. Ky investim është pjesë e strategjisë afatgjatë të modernizimit të Forcave të Armatosura, rritjes së parandalimit dhe përafrimit të plotë me kapacitetet dhe doktrinën e NATO-s.