Rikthehet shërbimi rezervist në Forcat e Armatosura të Republikës së Shqipërisë

e premte, 02 tetor 2026 13:08

Forcat e Armatosura të Republikës së Shqipërisë kanë nisur një kapitull të ri në zhvillimin dhe integrimin e rezervës, me rikthimin, pas më shumë se tri dekadash, të rezervistëve në stërvitje të rregullt ushtarake.

Fotogaleria

Në ceremoninë e organizuar me këtë rast ishin të pranishëm shefi i Shtabit të Përgjithshëm të Forcave të Armatosura, gjenerallejtënant Arben Kingji, zëvendësministrat e Mbrojtjes, znj. Pranvera Skana dhe z. Enkelejd Joti, zëvendësshefja e Shtabit të Përgjithshëm, gjeneral brigade Razie Mehmeti, gjeneralë dhe komandantë forcash e njësish në FA, drejtorë drejtorish në SHP, rezervistë etj.

Në fjalën e tij me këtë rast, Shefi i Shtabit të Përgjithshëm të FARSH-së, gjenerallejtënant Arben Kingji, pasi shprehu kënaqësinë për pjesëmarrjen në këtë ceremoni kaq të veçantë, vuri theksin te rëndësia e ndërtimit të një rezerve moderne, të integruar dhe të aftë për të përforcuar kapacitetet e forcës aktive në funksion të mbrojtjes kombëtare dhe përmbushjes së detyrimeve në Aleancë.

Gjenerallejtënant Kingji, gjatë fjalës së tij, nënvizoi se ky proces merr një rëndësi të veçantë në kushtet e mjedisit të sotëm të sigurisë, të karakterizuar nga zhvillime dinamike, kërcënime hibride dhe kibernetike, si dhe nga nevoja për kapacitete të shtuara për përballimin e emergjencave civile.

Në këtë kuadër, gatishmëria nuk duhet të kufizohet vetëm te reagimi i parë, por duhet të sigurojë edhe aftësinë për të përforcuar dhe rigjeneruar forcën, duke garantuar vijimësinë e mbrojtjes kombëtare në situata të zgjatura krizash kombëtare.

“Rezerva nuk ndërtohet kur fillon kriza. Ajo përgatitet në kohë paqeje, që të jetë gati kur vendi e kërkon…”, u shpreh SHSHPFA, duke theksuar se rezerva duhet të stërvitet dhe integrohet në mënyrë të vazhdueshme me forcën aktive.

Në këtë proces, vijoi SHSHPFA në fjalën e tij, komandantët, instruktorët dhe strukturat mbështetëse kanë një rol të rëndësishëm në krijimin e një sistemi të matshëm të integrimit dhe gatishmërisë. Rezervistët do të ndjekin një cikël progresiv trajnimi, nga stërvitja individuale dhe e avancuar, te stërvitja kolektive dhe integrimi me njësinë ku janë caktuar.

Procesi, u shpreh ai, mbështetet edhe nga përmirësimi i paketës ligjore për shërbimin ushtarak rezervist, e cila përcakton aktivizimin, të drejtat dhe detyrimet e rezervistëve, duke garantuar trajtim të njëjtë me ushtarakët aktivë gjatë periudhës së shërbimit dhe stërvitjes.

Duke iu drejtuar rezervistëve, Shefi i Shtabit të Përgjithshëm të FARSH-së, gjenerallejtënant Arben Kingji, i mirëpriti ata në radhët e Forcave të Armatosura, duke vlerësuar njohuritë dhe aftësitë që sjellin nga jeta civile, si dhe përvojën ushtarake të një pjese të tyre. Ai u kërkoi rezervistëve të njohin njësinë, të zotërojnë detyrën funksionale, të shkëmbejnë përvojën dhe të stërviten sipas të njëjtave standarde dhe procedurave si forca aktive.

Një nga objektivat e përcaktuara deri në vitin 2029 është të trajtohet dhe integrohet mbi 80% e rezervës.

“Vizioni im”, u shpreh gjenerallejtënant Kingji, “është i qartë: forca aktive dhe rezerva të funksionojnë si një forcë e vetme, e stërvitur, e integruar dhe e gatshme për mbrojtjen kombëtare dhe detyrimet tona në Aleancë.”

Gjenerallejtënant Kingji e mbylli fjalën e tij duke iu përcjellë personelit aktiv dhe rezervist mesazhin: “Të stërvitemi së bashku. Të veprojmë së bashku dhe, kur kërkohet, ta realizojmë misionin së bashku. Një forcë. Një standard. Një mision. Ju uroj stërvitje të mbarë dhe suksese. Zoti i bekoftë Forcat e Armatosura!”