Fjala e plotë e ministres së Mbrojtjes znj. Mimi Kodheli për 6 - vjetorin e anëtarësimit në NATO

e premte, 03 prill 2015 10:30

I nderuar z. kryeministër,
shkëlqesi ambasadorë aleatë,
gjeneral Bazo, oficerë, nënoficerë dhe ushtarë,

Kam privilegjin dhe kënaqësinë të adresoj këtë ceremoni, ku kombinohet e djeshmja, e sotmja dhe e ardhmja jonë si vend, si Aleancë. Anëtarësimi i Shqipërisë në NATO, gjashtë vite më parë, kurorëzoi përpjekjet dhe punën e gjithanshme të shoqërisë shqiptare dhe Forcave të saj të Armatosura.

Politika e dyerve të hapura të NATO ka qenë një ndër sukseset më të mëdha të Aleancës dhe historia e përbashkët është bërë dëshmitarja më e denjë e këtij procesi. Procesi integrimit në NATO, së bashku me atë në Bashkimin Evropian, ka ndihmuar të fshijë disa nga kufijtë e dhimbshëm të ndarjes në Kontinentin Evropian. Këto procese i kanë bërë kombet më të prospertë dhe të sigurtë, drejt një Evrope të bashkuar dhe në paqe, ndaj ky proces duhet të vazhdojë. Aleanca e Atlantikut të Veriut, për ne, ka qenë gjithnjë më shumë se një pakt ushtarak. Kjo marrëdhënie speciale e vendeve demokratike në të dyja anët e Oqeanit Atlantik nuk është bazuar vetëm në interesa të përbashkëta politike, por dhe në vlera të përbashkëta, të cilat çdo vend anëtar i NATO është i gatshëm t’i mbrojë. Kjo strukturë sigurie, krijoi një lidhje të fortë transatlantike e cila gradualisht u vetëtransformua në boshtin më të fuqishëm të qytetërimit modern perëndimor.

Që në ditët e para të lirisë demokratike, ne shqiptarët iu bashkuam idesë së përbashkët se, zgjerimi i NATO drejt Lindjes do të garantonte ato ndryshime të qenësishme në të cilat kishin hyrë vendet ish - komuniste. Dua të falënderoj të gjithë ata që e kuptuan këtë sfidë historike dhe e mbështetën gjithnjë anëtarësimin e Shqipërisë në NATO, nga viti i tranzicionit të madh 1991 e deri në 2009. Roli që NATO luajti për të zgjidhur konfliktet e tmerrshme në Ballkan gjatë viteve ‘90, ku miliona jetë u shpëtuan vetëm falë ndërhyrjes së Aleancës në Bosnje dhe Hercegovinë e në Kosovë, ishte vendimtar dhe historik.

Një arsye më shumë pse unë besoj se dyert e Aleancës tonë, duhet të jenë të hapura për ato demokraci evropiane që ndajnë të njëjtat vlera, marrin përsipër përgjegjësitë e anëtarësimit dhe mund të krijojnë dhe zgjerojnë rrethin e sigurisë në zonën Euroatlantike. Maqedonia, Bosnja dhe Hercegovina, Mali i Zi dhe Kosova, kanë një destinacion, atë Euroatlantik. Le të jemi ne, përsëri si Aleancë, ata që bëjmë histori. Para gjashtë vitesh kjo ndodhi me Shqipërinë dhe Kroacinë, prandaj sot ne po kujtojmë ato momente gëzimi shqiptare, por njëkohësisht kujtojmë se duhet të vijojmë të ecim në këtë rrugë, si një forcë paqeje, sigurie, mirëqenie, si një Forcë Lirie.

Të nderuar pjesëmarrës,
Shqipëria dhe Forcat e saj të Armatosura, nuk filluan të merrnin përgjegjësi dhe angazhime në kuadër të Aleancës, prej Prillit 2009; kjo kishte filluar prej kohësh, që kur ne iu bashkuam Aleancës në operacione, misione dhe stërvitje të përbashkëta. Anëtarësimi i plotë në Aleancë, padyshim, solli më shumë detyrime, por jo çdo gjë duhet të lidhet vetëm në operacione e misione për menaxhim krizash, por edhe me dy shtyllat e tjera themelore të Aleancës si Mbrojtja Kolektive, ku ne jemi duke marrë pjesë nën parimin 28 për 28, si dhe në Sigurinë Bashkëpunuese.

Në mbështetje të vendimeve të Aleancës, të marra në Samitin e Uellsit dhe më pas gjatë ministerialeve NATO, ne si aleatë morëm vendime të rëndësishme për të forcuar mbrojtjen dhe reagimin tonë të përbashkët. Rrjedhimisht, kjo ka diktuar një qasje tjetër për të gjithë institucionet, dhe jo vetëm në fushën e sigurisë dhe mbrojtjes, por dhe në politikën e jashtme, menaxhimin e burimeve, komunikimet strategjike, etj.

Veprimet hibride e të paligjshme dhe dhuna e krijuar në kufijtë lindorë e jugore të Aleancës e kanë ndryshuar mjedisin e sigurisë në Europë. Këto kërcënime hibride orientale dhe multidimensionale, duan të vendosin në pikëpyetje ekzistencën tonë të përbashkët. Edhe në këtë kuptim, sot është edhe dita që në ushtrinë shqiptare të fillojë një rrugëtim, pa kthim, ku ne njëherë e përgjithmonë, i themi lamtumirë dhe jo vetëm simbolikisht, armës famëkeqe sovjetike “kallashnikov”, duke e zëvendësuar gradualisht me karabinën M4.

Të jemi të qartë, rrymave dhe ndikimit lindor i kemi thënë lamtumirë prej kohësh. Nevoja për të ndryshuar dhe për t’u përshtatur me standardet perëndimore ka qenë gjithmonë në mendimet e lidershipit të Ministrisë së Mbrojtjes, që prej fillimit të punës tonë. Dhe ky është vetëm elementi i parë i një pakete më të gjerë për modernizimin dhe transformimin e Forcave tona të Armatosura.
Bazuar plotësisht në parimin esencial të shfrytëzimit me efikasitet maksimal të çdo qindarke të taksapaguesve tanë, për të ndërtuar qartësisht një forcë të vogël në numër, por më e kalibruar dhe e aftë për kryerjen e misionit kushtetues në vend dhe më e gatshme dhe e shpejtë për t’u dislokuar, përkrah aleatëve dhe partnerëve tanë strategjikë, kudo dhe kurdo nevojitet.

Të nderuar ushtarakë,
Ju po tregoni fytyrën më të mirë të Shqipërisë në të gjithë angazhimet tuaja nëpër zonat më të rrezikshme të globit. Me dedikimin dhe përkushtimin tuaj, po lartësoni imazhin e vendit tonë dhe Forcave të Armatosura, duke u radhitur denjësisht në krah të aleatëve tanë. Oficerë, nënoficerë, ushtarë, kudo që jeni, si ministre e Mbrojtjes ju garantoj se ju nuk do jeni vetëm. Ju siguroj se qeveria shqiptare do t’ju mbështesë në çdo hap tuajin. Ne kemi detyrimin moral dhe profesional karshi jush, fëmijëve tuaj, familjeve tuaja.
Qofshi mirë djema! Vazhdoni të na nderoni kudo ku jeni!

Zonja dhe zotërinj,
Është në interesin tonë që ta mbajmë NATO si një bashkim efikas dhe funksional edhe në të ardhmen.
NATO duhet të vazhdojë të jetë elementi bazë i arkitekturës së mbrojtjes europiane.

Faleminderit, dhe njëherë urime të gjithë shqiptarëve në ditën e lidhjes së besës sonë me atë të Traktatit të Atlantikut të Veriut!