Newsroom Fjalime të ministrit Fjala e ministres Kodheli në Ditën e Hapur në Batalionin Komando
Të nderuar oficerë, nënoficerë dhe ushtarë,
të nderuar familjarë, miq e të pranishëm,
jam e kënaqur të marr pjesë në ditën e hapur të Batalionit Komando, së bashku me lidershipin e FA, ushtarakët, familjarët e ushtarakëve dhe të ftuarit, aq më tepër pas këtij demonstrimi që na sjell ndër mend sa shumë djersë e mund është derdhur në rajonin stërvitor të Zall Herrit, ku janë arritur standardet më të larta të stërvitjes së Forcave të Armatosura. Demonstrimi sot ishte domethënës për të prezantuar aktivitetet, teknikat dhe metodologjinë e stërvitjes që zhvillohet në Batalion. Unë nuk do të ndalem në detajet dhe elementët e veçantë se hyj në domenin e ushtarakëve, por shkurt dua të them se stacionet e përzgjedhura na ofruan një pasqyrë të aftësive taktike, cilësive fizike, dhe kapaciteteve që zotëron batalioni për përmbushjen me sukses të detyrave themelore të misionit.
Jam e sigurt se me përgatitjen, aftësitë, dhe përkushtimin tuaj, Ju do të jeni në gjendje të përmbushni me sukses sfidat që ju presin dhe do të qëndroni në lartësinë që kërkon nderi, detyra dhe atdheu. Me punën tuaj dhe të komandantëve tuaj, besoj se keni formimin, motivimin dhe përgjegjshmërinë për të vijuar kontributin që Forcat e Armatosura shqiptare i japin Aleancës, në funksion të paqes, lirisë dhe sigurisë.
Të nderuar ushtarakë,
mjedisi i sigurisë dhe gjeopolitikës ndryshon në mënyrë dramatike ku kriza ekonomike, kërcënimet në kufijtë lindorë dhe jugorë të Aleancës, terrorizmi dhe emigracioni gërshetohen dhe krijojnë skenarë të rrezikshëm. Të gjithë e kujtojmë sulmin ndaj kullave binjake në Shteteve të Bashkuara të Amerikës më 11 shtator të 2001. Disa muaj pas këtij akti çnjerëzor të terrorizmit, Komandot e parë u nisën drejt Afganistanit, pasi Shqipëria, i ishte bashkuar përfundimisht koalicionit të lirisë dhe vlerave më të mira të njerëzimit, në frontin më të dhunshëm dhe më të rrezikshëm. Komandot kanë kontribuar, jo vetëm në luftën kundër terrorizmit por edhe në shërbim të paqes dhe sigurisë, ku ka qenë nevoja. Kontributi ka arritur në 2340 trupa të dislokuar në operacione e misione, duke nisur me operacionin në Bosnjë-Hercegovinë, operacionin “ISAF” në Afganistan, “Liria e Irakut” në Irak, me misionin “EUFOR ” në Çad, për ta mbyllur në verën e këtij viti me një togë në RSM. Respekti për ju rritet sa herë angazhoheni në operacione luftarake ku lartësoni flamurin kombëtar dhe emrin tuaj. Duke shërbyer në frontin më të vështirë të Aleancës, në luftën kundër terrorizmit, në Irak dhe Afganistan, keni fituar mirënjohje dhe keni vendosur një tjetër bllok solid, në historinë e sakrificës, përkushtimit dhe profesionalizmit ushtarak.
Po ashtu Komandot kanë marrë pjesë në operacionet për përballimin e emergjencave, duke ndihmuar në përmbytje, zjarre, emergjenca apo fatkeqësi dhe janë angazhuar për ruajtjen e institucioneve, sigurimin e kufijve dhe objekteve të rëndësishme. Me këtë rast dua të falënderoj familjarët tuaj, bashkëshortet, prindërit, fëmijët, vëllezërit dhe motrat tuaja, prezentë ose jo, të cilët sakrifikojnë bashkë me ju, sikurse të gjitha familjet e ushtarakëve. Dua t’i falënderoj për mbështetjen që ju japin kur jeni të dislokuar duke kontribuar për paqen, sigurinë dhe luftën kundër ekstremizmit të dhunshëm. Faleminderit që jeni me mendje dhe zemër pranë tyre, në momentet e lodhjes, shqetësimeve dhe sukseseve. Mbështetja e juaj ka qenë lehtësim në përmbushjen me sukses të detyrave. Gjithashtu, përshëndes dhe shpreh vlerësimin dhe mirënjohjen për vendet aleate veçanërisht për Forcat e Armatosura Turke, dhe i falënderoj për bashkëpunimin dhe mbështetjen që ju kanë dhënë dhe vazhdojnë t’u japin forcave Komando, për rritjen e standardeve të stërvitjes dhe nivelit të gatishmërisë.
Të nderuar ushtarakë,
stërvitja e demonstruar në stacionet ku ndaluam sot na shpalosi përgatitjen tuaj dhe na shërben për të njohur nivelin e gatishmërisë për përmbushjen e detyrave. Përveç mjeshtërisë taktike dhe përgatitjes fizike, ju vlerësoj edhe për iniciativën e marrë për mbjelljen e fidanëve. Më tepër se numri i pemëve të mbjella, ka vlerë mesazhi që transmetohet. Ushtarakët dinë të jenë edhe qytetarë të përgjegjshëm dhe kontribuues në shoqëri. Duke u kujdesur për mjedisin sot, kujdesemi për të ardhmen e fëmijëve tanë nesër. Ka ardhur koha që të marrë fund dëmi që po i shkaktohet mjedisit nga mungesa e qytetarisë, papërgjegjshmëria dhe lakmia. Ju nuk mundeni të zhbëni këtë dëm, por sikurse edhe në të tjera raste, ju bëni atë që mundeni, kontribuoni për mjedisin e shëndetshëm dhe për një të ardhme më të mirë të gjeneratave të ardhshme.
Duke qenë se jemi në pragun e ndërrimit të viteve, Gëzuar Vitin e Ri dhe paçi gjithmonë suksese e të mira!
